Janseıit Túımebaev: Prezıdent Joldaýy - zaman talap etken naqty áreketterdiń baǵdarlamasy
Onyń aıtýynsha, Joldaýdyń Parlament sessııasynyń ashylýynda jarııalanýy jańa saıası maýsymnyń bastalýymen tuspa-tus keldi jáne onda Prezıdenttiń saılaýaldy baǵdarlamasyndaǵy bastamalar men usynystar qamtylǵan.
«Eń aldymen Prezıdent saıası júıeniń evolıýtsııalyq damýyna taǵy da nazar aýdardy. Júıesiz lıberalızatsııa ishki saıası jaǵdaıdy turaqsyz etip, memlekettilikti joǵaltýǵa deıin ákep soǵady. Sondyqtan, saıası reformalardy birizdi, turaqty júrgizý jolyn tańdaımyz. Sonymen birge, Memleket basshysy qoǵamdyq-saıası reformalardyń qajettigin aıtty. Myqty Prezıdent, yqpaldy Parlament, esep beretin Úkimet maqsatyna umtylýymyz qajet», - dedi J. Túımebaev.
QHA ókili azamattardyń suranysyna jedel jaýap beretin «Ashyq memleket» tujyrymdamasyn júzege asyrý mindetin de eske saldy. Onyń pármendi mehanızmderiniń biri retinde Ulttyq qoǵamdyq senim keńesin atady.
«Sonymen birge, Prezıdent qoǵamda rezonans týdyrǵan oqıǵalarǵa ún qatty. Ol Parlament pen Úkimetke jynystyq zorlyq, pedofılııa, esirtki taratý, adam saýdasy, turmystyq zorlyq-zombylyq úshin jazany kúsheıtýdi tapsyrdy. Joldaýda halyqty tolǵandyrǵan kóptegen suraqtarǵa jaýap berildi. Bul – zaman talap etken naqty áreketterdiń baǵdarlamasy. Endi qoıylǵan mindetterdi tabysty júzege asyrý úshin memlekettik organdar men azamattyq qoǵam ókilderin tartyp, quqyqtyq, uıymdastyrý jáne ózge de qajetti jaǵdaıdy jasaý mańyzdy», - dedi J. Túımebaev.