Janseıit Túımebaev Qordaı aýdanyndaǵy etno-mádenı birlestik basshylarymen kezdesýler ótkizdi

NUR-SULTAN. QazAqparat - Memleket basshysy Qasym-Jomart Toqaevtyń Qordaı aýdanyndaǵy oqıǵa saldaryn joıý jónindegi tapsyrmasy boıynsha Úkimet komıssııasynyń quramymen Qazaqstan halqy Assambleıasynyń Tóraǵasynyń orynbasary Janseıit Túımebaev senbi kúni Jambyl oblysyna bardy, dep habarlaıdy QazAqparat.

QHA baspasóz qyzmetiniń málimetinshe, Qordaı aýdanyndaǵy Masanchı, Aýqatty, Sortóbe eldimekenderindegi jaǵdaımen tanysyp, jappaı tóbeles saldarynan qaza bolǵan otbasylarǵa kóńil aıtty. Aýrýhanada jatqan azamattardyń jaǵdaıyn bilip, jergilikti turǵyndarmen, aýdan aqsaqaldarymen, QHA múshelerimen, etno-mádenı birlestik basshylarymen kezdesýler ótkizdi.

Jeksenbide de komıssııa jumysyn jalǵastyryp, qazaq-qyrǵyz shekara pýnktterindegi aýyl turǵyndarymen sóılesip, turǵyndardy úılerine qaıtyp oralýǵa shaqyrdy.

Sondaı-aq Janseıit Túımebaev oryn alǵan oqıǵanyń tek turmystyq sıpattaǵy kıkiljiń ekenin taǵy da atap ótti.

«Óńirdegi turǵyndardyń qaýipsizdigi men quqyqtyq tártiptiń saqtalýyn qamtamasyz etý maqsatynda qurylǵan Úkimet komıssııasy oqıǵanyń saldaryn joıý boıynsha barlyq qajetti sharalardy atqarýda. Qaza bolǵandardyń týystary men jaqyndaryna tıisti kómek kórsetilip jatyr. Kináliler, jeke azamattar, ásirese kıkiljińdi týdyrǵandar men arandatýshylar zańǵa sáıkes qatań jazalanatyn bolady. Ultaralyq tatýlyq pen qoǵamdyq kelisim elimiz úshin eń qymbat qazyna ekenin umytpaýymyz kerek», dedi Janseıit Túımebaev.