Janseıit Túımebaev qoǵamdyq qabyldaý ótkizdi
Óńir turǵyndary qaýzaǵan máseleler alýan túrli boldy. Máselen, aýyldyq jerdegi elektr baǵanalarynyń eskirgeni, medıtsınalyq saqtandyrý júıesi, genderlik saıasat máseleleri aıtylyp, Názir Tórequlovtyń 125 jyldyǵyn atap ótý, turǵyn úı kezegin jyljytý jóninde kómek surap keldi. Óńir basshysy qabyldaýǵa kelgen ár adamnyń máselesi boıynsha tıisti oryndarǵa tapsyrmalar berdi, dep habarlaıdy QazAqparat.
Qoǵamdyq qabyldaýǵa kelgen Saıram aýdany Tespe eldimekeniniń turǵyny, zeınetker Jamalbek Perneev aýyldaǵy elektr baǵanalarynyń eskirgenin aıtyp shaǵymdandy.
«Aýylymyzdaǵy elektr baǵanalary ábden tozyp, qulaýdyń aldynda tur. Bul máseleni kóterip, aýdan basshylyǵyna da shaǵym túsirgenbiz. Alaıda, oń sheshimi bolmaı tur»,- dedi zeınetker.
Oblys ákimi atalǵan máseleniń 2018 jyly ınvestıtsııalyq baǵdarlama aıasynda sheshiletinin aıtty.
«Saıram aýdany, Kólkent aýyldyq okrýgi, Tespe aýylynda ornatylǵan 6,254 shaqyrym elektr jelisi men transformator «Ońtústik Jaryq Tranzıt» JShS-niń teńgeriminde. 2016 jyly «Ońtústik Jaryq Tranzıt» JShS-niń ınvestıtsııalyq baǵdarlamasy esebinen jaramsyz 12 dana aǵash baǵanasy symdarymen birge aýystyryldy. Al bıyl qýaty 100 kVA bolatyn qosymsha bir transformator ornatý josparda bar. 2018 jylǵy ınvestıtsııalyq baǵdarlamaǵa sáıkes, turǵyndardy qamtamasyz etýdegi 100 kVA transformatordy 160 kVA transformatorǵa, tómengi kerneýli 0,4 kV-tyq elektr baǵanalarymen qosa, elektr jelisin tolyǵymen aýystyrý josparlanǵan», - dedi Janseıit Qanseıituly.
Al Áıelder keńesiniń tóraıymy Baıan Jandosova óńirdegi áıelder qaýymynyń jáne otbasy qundylyqtaryn saqtaý tóńiregindegi qordalanǵan máselelerge toqtaldy.
Halyqaralyq qaıyrymdylyq qorynyń prezıdenti Ábdijappar Saparbaev qoǵam qaıratkeri Názir Tórequlovtyń týǵanyna 125 jyl tolýyn ońtústik jerinde atap ótýdi usyndy.
Qazaqstandyq densaýlyq saqtaý qyzmetkerleri salalyq kásipodaǵynyń OQO fılıalynyń tóraıymy Rıta Aıanııazova aýyldyq jerlerdegi medıtsınalyq saqtandyrý júıesiniń oryndalý barysyn sóz etti.
Al Saıram balalar úıiniń túlegi Lýıza Salımjanqyzy 2013 jyldan úı kezegine tirkelgenin, alaıda baspanaǵa qol jetkize almaı otyrǵanyn jáne kúıeýiniń jumyssyz júrgenin aıtyp keldi. Óz kezeginde ákim jyl sońyna deıin páter beriletinin málimdep, jumyssyz júrgen otaǵasyn jaýapty tulǵalarǵa eńbekpen qamtamasyz etýdi tapsyrdy.