Janseıit Túımebaev QHA ǵalymdarymen kezdesti

ALMATY. QazAqparat - Qazaqstan halqy Assambleıasy tóraǵasynyń orynbasary Janseıit Túımebaev bir top ǵalymmen kezdesti. Olardyń ishinde Ál-Farabı atyndaǵy Qazaq ulttyq ýnıversıtetiniń QHA kafedraaralyq ǵylymı bilim berý ortalyǵy ǵalymdary jáne Almaty qalasy QHA ǵylymı sarapshylar tobynyń músheleri bar, dep habarlaıdy QazAqparat tilshisi.

QHA tóraǵasynyń orynbasary kún tártibin eskere otyryp, árbir qazaqstandyqtyń eldegi qaıta qurý úderisterine qatystylyǵyn qalyptastyrý boıynsha jańa tásilderdi ázirleýge QHA ǵylymı saraptamalyq quramyn tartýdyń mańyzy bolyp tabylatynyn atap ótti.

«Kelisim men beıbitshilik saltanat qurǵan kez-kelgen elde turaqty ekonomıkalyq damý bolmaq. Búginde alǵa qoıylǵan mindetterdi sheshýge barynsha muqııat bolý kerek. Eń bastysy osyny halyqqa durys jetkizý mańyzdy», - dedi Janseıit Túımebaev.

Odan bólek, ol QHA qyzmetin ǵylymı-saraptamalyq súıemeldeýdiń negizgi mindetteri týraldy aıtyp berdi. Atap aıtqanda, QHA ǵylymı saraptama quramynyń qyzmeti bolashaqta eki baǵytta bolýy tıis.

Eń aldymen ǵylymı qaýymdastyq oqıǵalardyń damý úrdisin boljap, shuǵyl jumys isteýge, kemshilikterdi baıqap, keleńsiz jaılardyń aldyn alýy tıis.

Ekinshi baǵyt - QHA jumysyn ǵylymı ádistemelik qamtamasyz etý. Ol úshin problemalyq máseleler boıynsha áleýmettik ǵylymǵa negizdelgen zertteýler, onyń ishinde áleýmettik ólshemder negizinde jasalǵan zertteýler qajet.

Janseıit Túımebaev QHA ǵylymı saraptamalyq tobyna 10 jyl tolǵanyn aıtty.

«Osyǵan baılanysty úlken ǵylymı konferentsııa ótkizýdi josparlap otyrmyz. Búginde barlyq óńirde 17 ǵylymı ekspertter toby jumys istep jatyr. Olarǵa 262 ǵalym, sarapshy kiredi. Bul keremet áleýet», - dedi ol.