Jankúıerlerimiz bizge zor úmit artyp otyrǵanyn jaqsy bilemiz – Myrzaǵalı Aıtjanov

<p>PARIJ. KAZINFORM &ndash; Keshe el jankúıerleri basty úmit artyp otyrǵan boksshylar arasynda jerebe tartý rásimi ótken bolatyn. Atalǵan sharadan keıin, Ulttyq quramanyń bas bapkeri Myrzaǵalı Aıtjanovqa arnaıy habarlasyp, alǵashqy qarsylastarymyzdyń qanshalyqty qarymdy boksshylar ekenin surap bilgen edik.</p>

«Alǵashqy qarsylastarymyzdyń kimder ekenin bildik. Sol qarsylastarymyzdy utqan jaǵdaıda, kelesi aınalymda kimdermen judyryyqtasatynymyzdy da baǵamdap otyrmyz. Jalpy, Olımpıada oıyndaryna álemniń eń úzdik boksshylary suryptalyp keldi. Barlyǵy ońaı shaǵyla qalatyn jańǵaq emes. Sondyqtan, bizdiń ár jekpe-jektegi jeńisimiz asa mańyzdy. Qatelikterge múlde jol berýge bolmaıdy. Sharshy alań qatelikti múlde keshirmeıdi. Onsyz da qazaq jankúıerleri boksshylarǵa asa qatty úmit artyp otyrǵany belgili. Biz sol úmitti aqtaýǵa bar kúshimizdi salamyz», - dep atap ótti bas bapker.

«Boksshylarymyz jarysqa qanshalyqty daıyn, Parıjge kelgennen keıingi kóńil-kúıleri qalaı?» degen saýylymyzǵa bapker «bári keremet» dep qysqa ǵana jaýap qaıyrdy.

Esterińizge sala ketsek, keshe boksshylar arasynda jerebe tartý rásimi ótip, alǵashqy qarsylastarymyz anyqtalǵan bolatyn.

Erler arasynda 51 keli salmaqta Sáken Bıbosynov alǵashqy jekpe-jegin túrkııalyq Samet Kýmýshke qarsy ótkizse, 57 keli salmaqta Mahmud Sabyrhan – Ispanııa boksshysy Hose Kılespen sharshy alańǵa shyǵady. 

Al 63,5 kelide Muhamedsabyr Bazarbaıuly taǵy bir ıspanııalyq Oıer Ibarreche Kondege qarsy judyryqtasady.

71 kelide komanda kapıtany Aslanbek Shymbergenov ıordanııalyq Zııad Ishıashpen qolǵap túıistiredi.

80 kelide Nurbek Oralbaı Avstralııa boksshysy Kallým Peterspen, al 92 keli Aıbek Oralbaı - Olaıtan nıgerııa Adam Olaormen rıngke kóteriledi.

Sondaı-aq, asa aýyr salmaqtaǵy boksshymyz Qamshybek Qońqabaev Ispanııa boksshysy Gadfa Drıssımen ózara myqtyny anyqtaıdy.