Jankúıerlerdi joǵaltyp jatyrmyz: Golovkınniń bapkeri revansh nátıjesine alańdaýly

ASTANA. QazAqparat - WBC/WBA/IBF/IBO tujyrymdary boıynsha orta salmaqtaǵy burynǵy álem chempıony Gennadıı Golovkınniń bapkeri Abel Sanches GGG-diń Saýl Alvarespen eki aıqasy da tóreshilerdiń daýly sheshimimen aıaqtalýy boks súıer qaýymnyń bul sportqa kóńilin qaldyratynyn aıtty. Bul týraly QazAqparat Sports.kz saıtyna silteme jasap habarlaıdy.

GGG men «Kanelo» birinshi aıqasy teń nátıjemen aıaqtalsa, ekinshi jekpe-jekte tóreshiler jeńisti Alvareske berdi. Al jekelegen jankúıerler men sarapshylar osy aıqastarda Golovkın jeńýi tıis dep esepteıdi. 

«Meniń oıymsha, osyndaı sheshimderdiń saldarynan boks fanattaryn joǵaltyp jatyrmyz. Iá, bul qıyn aıqas boldy. Biraq Gennadıı onda jeńilgen joq. Ol tek qana óz paıdasyna sheshim ala almady. Birinshi jekpe-jek mundaı bolǵan joq, sebebi onda belsendi áreketter jasalmady. Sońǵy aıqasta Gennadııdiń qalaı bokstasqanyn esepke alsaq, nátıje 7-5 bolýy kerek edi. Áleýmettik jelide meniń esebimniń durys bolǵanyn quptaǵandar jetkilikti boldy.

Osyndaı daýly sheshimder bolmas úshin bir nárse ózgerýi tıis. Bul eki ret qaıtalandy. Jankúıerler mundaı sheshimge alańdaýshylyq tanytty. Las-Vegasta bul birinshi jáne sońǵy ret bolyp otyrǵan joq. Durys adamnyń jeńiske jetýi úshin ózgerister jasaý qajet. Mıllıondaǵan jankúıerdiń qatelesýi múmkin emes. Qaıtalaýdy qarap otyrǵan kórermender de qatelespeıtin shyǵar. Biz fanattardy joǵaltpas úshin ózgerister jasalsyn», - dedi Sanches The Ring-ke bergen suhbatynda.