Janqosh Turarovtyń qarsylasy Qazaqstanǵa ushyp keldi

ALMATY. QazAqparat- Janqosh Turarovty tıtýldyq jekpe-jekte tize búktirip, belbeýdi alyp ketem dep senimdilik tanytqan Lıýs Enrıke Qazaqstanǵa ushyp keldi, dep habarlaıdy QazAqparat tilshisi.

Áýejaıdan kútip alǵan MOVIDA Promotions ókilderiniń aıtýynsha, ıspanııalyq boksshy kóńildi kórinedi.
Aıqasqa saqadaı saımyn ári óz jeńisime senimdimin dep qysqa jaýap qaıyrdy Lýıs Enrıke.
11 jeltoqsan kúni kásipqoı boks shoýynyń basty jekpe-jegi jeńilip kórmegen Janqosh Turarov (25-0, 18 KO) pen azýly ıspanııalyq Lýıs Enrıke Romero (11-5-1, 7 KO) arasynda ótedi. Qaýipti ári asa tartysty bolatyn bul aıqasta IBO Intercontinental chempıondyq tıtýly báske tigilgen.
Lýıs Enrıke óziniń DAZN aıasynda ótken sońǵy jekpe-jeginde myqty rýmyndyq rıng sheberin nokaýtpen jeńip, álemdik Boxrec reıtıngindegi TOP-60 boksshynyń qataryna kirdi.
Kásipqoı boks keshin, áıgili DAZN strımıngtik servısi tikeleı translıatsııada jahannyń 100 mıllıon aýdıtorııasyna taratpaqshy. Bul el sporty tarıhyndaǵy eleýli oqıǵanyń biri ári bedeldi sport platformasynyń elimizdegi alǵashqy efıri.
Jankúıerler boks keshinde Elhan Tabynbaev (5-0, 3 KO) pen brazılııalyq Mateýs Da Sılvamen (7-0, 3 KO) judyryqtasady.
Angelına Lýkas (2-0, 1 KO) osy keshte tanzanııalyq minezdi qyz Lýlý Kaıagemen (8-8-4, 2 KO) UBO chempıondyq tıttýlyn sarapqa salady.
Bul boks keshiniń tórinde Álıhan Tólenbaev (2-0, 1 KO) pen Adlan Selmýrzaev (4-0, 3 KO) sekildi qylyshtaı jarqyldaǵan jastarymyz da ónerin kórsetedi.
Buǵan deıin 11 jeltoqsan kúni Qazaqstandyq boksshylar Almatyda tıtýldyq jekpe-jek ótkizetini týraly habarlaǵan bolatynbyz.
Boks keshi «Almaty Arena» sport kesheninde ótedi.

Foto: instagram.com/movidapromotions