Janqosh Turarovtyń Almatydaǵy álem chempıony tıtýly úshin jekpe jegi tikeleı efırde kórsetiledi

ASTANA.QazAqparat - 21 naýryzda Almatyda ótetin boks keshinde qazaqstandyq boksshy Janqosh Turarov (26-0, 19 KO) óner kórsetedi, dep habarlaıdy QazAqparat Sports.kz-ke silteme jasap.

Turarov jartylaı orta salmaqtaǵy IBO chempıondyq ataǵy úshin meksıkalyq Alehandro Menesespen (16-5, 9 KO) judyryqtasady. Qazir bul belbeý meksıkalyq boksshyǵa tıesili.

Barlyǵy on eki jekpe-jek josparlanǵan. «Habar» telearnasynyń tikeleı kórsetilimi Astana ýaqytymen 20:00-de bastalady.

Janqosh Turarov buǵan deıingi jekpe-jegin qarasha aıynda Almatyda ótkizip, venesýelalyq boksshy Lýıs Enrıke Romerony (11-6-1, 7 KO) jetinshi raýndta nokaýtqa túsirip, jartylaı orta salmaqtaǵy IBO Inter-Continental tujyrymy boıynsha bos turǵan chempıon ataǵyn jeńip alǵan bolatyn. Alehandro Meneseske keletin bolsaq, ol ótken sáýirde brıtandyq Sem Maksvellmen (17-1, 11 KO) judyryqtasyp, ony toǵyzynshy raýndta nokaýtqa jibergen. Maksvell úshin bul jeńilis onyń kásipqoı mansabyndaǵy alǵashqy jeńilis boldy jáne dál sol jekpe-jekte Meneses IBO álem chempıony atandy.

Buǵan deıin habarlaǵanymyzdaı, jekpe-jek qarsańynda Turarov pen Meneses sanat shegin (63,5 keli) sátti oryndady, sonymen qatar dástúr boıynsha kóz túıistirdi.