Jánibek Qojyq: Sheteldik jumys kúshine kvota qysqarsa, eldegi jumyssyzdar sany da azaıady
Eske sala ketsek, Jánibek Qojyq — ózi de sol Ulttyq keńes múshesi. Osyǵan oraı ol sheteldik jumysshylar jáne eldegi jumyssyzdyq máselesi buǵan deıingi otyrys aıasynda kóterilgenin atap ótedi. Jánibek Qojyqtyń aıtýynsha, Ulttyq keńes jumysyn synaıtyndar da, quptaıtyndar da barshylyq. Bul, árıne, qoǵamnyń zańdylyǵy, oı men pikirdiń erkindigi. Sondyqtan da ol barlyq pikirlerge túsinistikpen qaraıtynyn alǵa tartady.
«Eń bastysy elime, jerime, qarapaıym aýyl halqyna sál de bolsa paıdam tısin degen maqsatpen osy keńeske kirdim. Men aýylda turamyn, aýyl halqynyń eń basty máselesi - jumyssyzdyq. Jastar jumys izdep qalaǵa kóshýde, soǵan qaraǵanda qalanyń jaǵdaıy, aýylǵa qaraǵanda shúkir bolar dep oılaımyn»,-dep jazady Jánibek Qojyq áleýmettik jelide.
Ulttyq keńestiń alǵashqy otyrysy 6 qyrkúıekte ótken bolatyn. Onda Jánibek Qojyq ta jumyssyzdyq máselesin jáne ony azaıtýdyń joldary týraly másele kótergen eken.
«Eń bastysy, shetelden keletin jumysshylarǵa beriletin kvotanyń sanyn qysqartý, zańsyz kelgenderin elden shyǵarý, olardyń ornyna jumyssyz júrgen jastardy jumysqa qabyldaýdy suraǵan bolatynmyn. Ulttyq keńestiń 20 jeltoqsandaǵy ótken ekinshi otyrysynda Memleket basshysy Qasym-Jomart Toqaev myrza shetelden keletin jumysshylarǵa beriletin kvotanyń sanyn qysqartyp, olarǵa qoıylatyn talaptardy kúsheıtip, bul jaǵdaıdy qatań baqylaýǵa alatynyn aıtty»,-dedi ol.
Jánibek Qojyqtyń oıynsha, sol qysqarǵan sheteldik jumysshylardyń ornyna jumyssyz júrgen myńdaǵan jastar jumysqa kiretin bolady.
«Bul teńizge tamǵan tamshydaı bolsa da elge tıgen paıda ǵoı. Sondyqtan da Ulttyq keńeske kirgenim úshin, ázirge, ókinbeımin. Múmkindigiń bolyp turǵanda Ulttyq keńesti eldiń múddesine nege paıdalanbasqa, nege eldiń amanatyn bılikke týra aıtpasqa?! Álde de talaı aıtar usynystarym, mańyzdy máselelerim bar»,-dep jazdy qoǵam belsendisi.