Jánibek Álimhanulynyń tıtýldyq jekpe-jegi tikeleı efırden kórsetiledi

ASTANA. QazAqparat - Jeksenbi, 14 mamyrda tańerteń qazaqstandyq boksshy Jánibek Álimhanuly (13-0, 8 KO) kanadalyq Stıven Batlermen (32-3-1, 26 KO) judyryqtasady, dep habarlaıdy QazAqparat Sports.kz portalyna silteme jasap.

Álimhanuly men Batler jekpe-jegi Stokton qalasynda (AQSh, Kalıfornııa) ótedi. Tikeleı efır Astana ýaqytymen saǵat 07:00-de bastalady. Qazaqstandyq jankúıerler jekpe-jekti tikeleı efırde Habar telearnasynan kóre alady.

Aldaǵy jekpe-jekte qos boksshy Álimhanulyna tıesili orta salmaqtaǵy álem chempıony tıtýly úshin judyryqtasady.

Jánibek sońǵy jekpe-jegin ótken jyldyń qarasha aıynda ótkizgen: ol brıtandyq boksshy Denzel Bentlımen (18-2-1, 15 KO) judyryq túıistirip, tóreshilerdiń biraýyzdan qabyldaǵan sheshimimen jeńiske jetti. Batler jeltoqsan aıynda amerıkalyq Djoshýa Konlımen (17-5-1, 11 KO) jekpe-jekte jeńimpaz atanǵan.