Jánibek Álimhanulynyń qarsylasy anyqtaldy

ASTANA. QazAqparat – WBO nusqasy boıynsha orta salmaqtaǵy álem chempıony qazaqstandyq Jánibek Álimhanulynyń (14-0, 9 KO) kezekti qarsylasy anyqtaldy, dep habarlaıdy QazAqparat tilshisi.

Bul jaıynda Álimhanulynyń PR-menedjeri Berik Sultan óziniń facebook paraqshasynda málim etti.

«Resmı! Eki álem chempıony judyryqtasady!

14 qazan.

Tehasta!

Qarsylas IBF tujyrymy boıynsha álem chempıony. Rekordy 21-0. Germanııalyq. Jasy 30-da.

Bul - bizdiń mansabymyzdaǵy eń úlken jekpe-jek. Tıtýl biriktirer sát. Eki tujyrymda álem chempıony atanatyn ýaqyt! Qudaı qalasa, álemdi shýlatamyz. Tarıh jasaımyz!» - dep jazdy óziniń Berik Sultan.

Qos chempıon arasyndaǵy aıqas 14 qazanda Rozenbergtegi Fort Bend Epicenter arenasynda, Hıýston mańynda (Tehas shtaty) ótedi.

Nemis boksshysy Vınchentso Gýaltıerı (21-0-1, 7 KO) - IBF chempıony. Ol osyǵan deıin shilde aıynda brazılııalyq Eskıva Falkaony jeńip, chempıon atanǵan.

Al Álimhanuly sońǵy ret mamyrda chempıondyq belbeýin Stoktonda (Kalıfornııa, AQSh) qorǵady, ol kezde kanadalyq Stıven Batlerdi (32-4-1, 26 KO) ekinshi raýndta nokaýtpen jeńdi.

Esterińizge sala keteıik, osyǵan deıin Jánibek Álimhanuly jattyqtyrýshysyn aýystyrǵanyn jazǵan bolatynbyz.