Jánibek Álimhanuly jeńilip kórmegen brazılııalyq boksshymen jekpe-jek ótkizýge kelisti
09:58, 02 Qyrkúıek 2022
NUR-SULTAN. QazAqparat – WBO nusqasy boıynsha orta salmaqtaǵy álem chempıony qazaqstandyq Jánibek Álimhanuly (12-0, 8 KO) Búkilálemdik boks uıymy reıtıngisiniń úshinshi satysynda turǵan brazılııalyq Eskıva Falkaomen (30-0, 20 KO) jekpe-jek ótkizýge kelisti, dep habarlaıdy QazAqparat Sports.kz saıtyna silteme jasap.
Bir kún buryn Falkao Álimhanulyna jekpe-jek ótkizýge kezekti usynys bildirdi. Jaýap retinde «Qazaq stıli» Falkaoǵa naqty usynys bolǵan jaǵdaıda Eskıvamen aıqasýǵa qarsy emes ekenin aıtyp, onyń komandasymen osyndaı jekpe-jekti talqylaýdy usyndy.
Buǵan deıin Jánibek Álimhanuly brazılııalyq boksshyǵa basqasha jaýap berip, alǵashynda: «Maǵan chempıondyq ataǵy joq boksshylar qyzyq emes» dep, keıin 2012 jylǵy Olımpıada júldegerine «múgedekter arbasyna otyrǵyzamyn» dep ses kórsetken bolatyn.