Jánibek Álimhanuly WBO álem chempıony tıtýly úshin mindetti kandıdat boldy

NUR-SULTAN. QazAqparat – WBO Dúnıejúzilik boks uıymy amerıkalyq chempıon Demetrıýs Andradege qazaqstandyq boksshy Jánibek Álimhanulymen jekpe-jek ótkizip, óz tıtýlyn qorǵaýdy mindettedi, dep habarlaıdy QazAqparat Sports.kz saıtyna silteme jasap.

«Orta salmaqtaǵy álem chempıony ataǵy úshin joǵaryda atalǵan mindetti jekpe-jek boıynsha WBO taraptarǵa kelissózdi bastaýǵa buıryq etedi. Osy habarlama jiberilgennen keıin taraptarǵa kelissóz ótkizýge jáne kelisimge kelýge 20 kún beriledi», - dep málimdedi WBO-dan.

Aıta keteıik, bul hat Demetrıýs Andradeniń promoýteri Eddı Hırnge jáne Jánibek Álimhanulynyń menedjeri Bob Arýmǵa arnalǵan.

Jánibek Álimhanuly (10-0, 6 KO) sońǵy aıqasyn 21 qarashada Las-Vegasta ótkizdi. Ol frantsııalyq Hassan Ndam Njıkamdy (38-5, 21 KO) belgilengen 10 raýndtyń 8-inshi raýndynda tehnıkalyq nokaýtpen jeńdi. Osylaısha qazaq boksshysy WBO Global chempıony tıtýlyn qorǵap qaldy.

Jánibek Álimhanuly 1993 jyly 1 sáýirde dúnıege kelgen. Áýesqoı boksta 2013 jyly álem jáne Azııa chempıony atandy. Al 2014 jyly Azııa oıyndarynda jeńis tuǵyrynan kórindi. Kásipqoı boksta 2016 jyldan beri synǵa túsip keledi. On jekpe-jeginiń barlyǵynda jeńiske jetti. Onyń altaýy nokaýtpen aıaqtaldy.