Jánibek Álimhanuly tıtýldy jekpe-jegi aldynda jankúıerlerine úndeý jasady
«Qurmetti jankúıerler! Qoldaýlaryńyzǵa raqmet. Sizder bizdiń komandamyzsyzdar! Sizder bizdiń tileýlesimizsizder! Aıtqan, jazǵan qoldaý sózderińiz bizge qosymsha kúsh! Buıyrtsa tarıh jasaımyz! QAZAQ STYLE dáýiri keldi!», - dep jazdy boksshy óziniń jelidegi paraqshasynda.
Aıta ketsek, Jánibek Álimhanuly men Dennı Dıgným jekpe-jegi Las-Vegasta 22 mamyrda saǵat 8:00-de bastalady. WBO nusqasy boıynsha orta salmaqtaǵy «ýaqytsha» álem chempıony ataǵy úshin judyryqtasý aldynda boksshylar kezdesip, kóz túıistirdi.
Aıqas «Habar» telearnasynan tikeleı efırde kórsetiledi.
Jánibek Álimhanuly 1993 jyly 1 sáýirde dúnıege kelgen. Áýesqoı boksta 2013 jylǵy Álem jáne Azııa birinshilikterinde chempıon atandy. 2014 jyly Azııa oıyndarynda jeńis tuǵyryna kóterildi. Kásipqoı boksta 2016 jyldan beri synǵa túsip keledi.
Buǵan deıin 11 jekpe-jeginiń barlyǵynda qarsylastaryn qapy qaldyrdy. Olardyń 7-i nokaýtpen aıaqtalǵan.