Jánibek Álimhanuly kelesi jekpe-jegine qatysty málimdeme jasady

ASTANA. QazAqparat – Dúnıejúzilik boks uıymynyń (WBO) orta salmaq sanatyndaǵy chempıony Jánibek Álimhanuly (12-0,8 KO) kezekti jekpe-jegine qatysty málimdeme jasady, dep habarlaıdy QazAqparat.

«Kóptegen boksshylar jan-jaqqa qashqan kezde, shaqyrýdy qabyl alǵany úshin Denzel Bentlıge alǵys aıtamyn. Las-Vegastaǵy The Palms-ta álem chempıony ataǵyn qorǵaý men úshin úlken qurmet jáne álemge «Qazaq stıli» ne ekenin taǵy bir ret kórsetetin bolamyn», — dep keltirilgen Álimhanulynyń sózi VKontakte áleýmettik jelisindegi «Qazaqstannyń kásipqoı boksy» paraqshasynda.

Sondaı-aq qazaqstandyq boksshy Instagram-daǵy jeke paraqshasynda: «Vegasta kóriskenshe! Kózildirik taǵyp kel, sebebi men rıngte jarqyraıtyn bolamyn. Qazaq Style», - degen jazba ornalastyrdy.

Aıta keteıik, keshe Top Rank promoýterlik kompanııasy J.Álimhanuly – D.Bentlı (17-1-1,14KO) jekpe-jegin resmı túrde jarııalaǵan bolatyn. «Senbi, 12 qarasha kúni Palms-tegi týrnırde álem chempıony ataǵy úshin eki jekpe-jek ótedi», - dep jazdy Top Rank Instagram-da.

Eske salaıyq, Jánibek Álimhanuly bıylǵy 22 mamyrda brıtanııalyq Dennı Dıgnýmdy (14-0-1, 8 KO) ekinshi raýndta nokaýtqa túsirip, WBO nusqasy boıynsha orta salmaqta «ýaqytsha» chempıon atanǵan edi.

Keıin Amerıka boksshysy Demetrıýs Andrade J.Álimhanulymen mindetti jekpe-jekten bas tartty. Osyǵan baılanysty, qazaqstandyq boksshyǵa «ýaqytsha» chempıonnan orta salmaqtaǵy WBO nusqasy boıynsha tolyq quqyly álem chempıony mártebesi berildi.

Qazaqstandyq boksshyny QR Prezıdenti Qasym-Jomart Toqaev quttyqtady.

Foto: vk.com/kazproboxing