Jánibek Álimhanuly qarsylasy Rob Brantpen alǵash ret betpe-bet kezdesti

NUR-SULTAN. QazAqparat – Qazaqstandyq boksshy Jánibek Álimhanuly (9-0, 5KO) jekpe-jek qarsańynda amerıkalyq Rob Brantpen (26-2, 18KO) betpe-bet kezdesti. Bul Álimhanulynyń Brantpen alǵash ret júzdesýi, dep habarlaıdy QazAqparat.

Jekpe-jek 27 maýsym, jeksenbi kúni, tańerteń Las-Vegasta (AQSh, Nevada shtaty) ótedi. Keshtiń basty oqıǵasy ýkraınalyq Vasılıı Lomachenko (14-2, 10KO) men japon boksshysy Masaesı Nakatanı (19-1, 13KO) arasyndaǵy aıqas bolmaq.

Jánibek Álimhanuly buǵan deıingi sońǵy jekpe-jegin ótken jyldyń qazan aıynda ótkizip, argentınalyq Gonsalo Korııany (16-4, 6ko) ekinshi raýndta nokaýtqa jibergen edi. Al Rob Brant 2020 jyldyń tamyzynda rıngke shyǵyp, ýkraınalyq boksshy Vıtalıı Kopylenkony (28-3, 16KO) besinshi raýndta merziminen buryn jeńdi.

Aıta keteıik, Álimhanuly-Brant kezdesýiniń tikeleı translıatsııasy Nur-Sultan ýaqyty boıynsha saǵat 08:00-de bastalady jáne «Habar» telearnasynan kórsetiledi.

Buǵan deıin qazaqstandyq boksshynyń osy aıqas aldynda koronavırýsqa test tapsyrǵanyn jazǵan bolatynbyz.

Jánibektiń aıtýynsha, ol Vegasta bokstyń qazaq mánerin kórsetetin bolady.