Jánibek Álimhanuly kanadalyq qarsylasymen aıqas aldynda kóz arbasty

ASTANA. QazAqparat - Orta salmaqta WBO chempıony Jánibek Álimhanuly (13-0, 8 KO) kanadalyq Stıven Batlermen (32-3-1, 26 KO) jekpe-jek aldynda kóz arbasty, dep habarlaıdy QazAqparat tilshisi.

Boksshylar búgin resmı baspasóz máslıhatynda kezdesti.

Jekpe-jek jeksenbi, ıaǵnı 14 mamyr kúni ótedi. Bul kezdesý 12 raýndqa eseptelgen.

Qazaqstandyq chempıon tıtýlyn ekinshi ret qorǵamaq.

Qos boksshy arasyndaǵy jekpe-jek Stokton qalasynda (AQSh, Kalıfornııa) ótedi.

Tikeleı efır Astana ýaqytymen saǵat 07:00-de bastalady. Qazaqstandyq jankúıerler jekpe-jekti tikeleı efırde «Habar» telearnasynan kóre alady.

Aıta keteıik, Jánibek sońǵy jekpe-jegin ótken jyldyń qarasha aıynda ótkizip, brıtandyq boksshy Denzel Bentlımen (18-2-1, 15 KO) judyryq túıistirdi.

Nátıjesinde tóreshilerdiń biraýyzdan qabyldaǵan sheshimimen jeńiske jetti.

Batler jeltoqsan aıynda amerıkalyq Djoshýa Konlımen (17-5-1, 11 KO) jekpe-jekte jeńimpaz atanǵan.