Jánibek Álimhanuly Gollıvýdtaǵy juldyzdar alleıasynda esimin qaldyrmaq

ALMATY. QazAqparat – «Jigit bolsań shoq bol, shoq bolmasań joq bol». Áleýmettik jelidegi paraqshasynda osylaı dep jazǵan WBO nusqasy boıynsha orta salmaqtaǵy álem chempıony Jánibek Álimhanuly Gollıvýdtaǵy «Juldyzdar alleıasynda» esimin qaldyrýǵa nıetti ekenin aıtty, dep habarlaıdy QazAqparat tilshisi.

Boksshy óz atynyń Muhammed Álıdiń esimi janyna jazylǵanyn qalaıdy.

«Mine, myna jerde Muhammed Álıdiń aty jazylǵan. Myna jaǵynda kishkene bos oryn tur. Qudaı qalasa, tarıhta qalyp, osy orynǵa atymyzdy jazdyrsaq degen oı da, maqsat ta bar. Adam istegendi adam isteıdi. Bizdiń kareradaǵy jospardyń biri – osy jerge Qazaq style atyn jazý», - dedi ol.

Eske salaıyq, Jánibek Álimhanuly (14-0, 9 KO) kezekti jekpe-jeginiń aldynda jattyqtyrýshysyn aýystyrǵan bolatyn.