Jáńgir han týraly tarıhı telehıkaıanyń túsirilimi bastaldy
«Aqparat jáne qoǵamdyq damý mınıstrliginiń tapsyrysymen el tarıhyna qatysty taǵy bir tanymdyq telehıkaıany túsirý jumysy bastaldy. «Saraı syry» serıaly – Bókeı ordasynda 1823-1845 jyldary bılik qurǵan Jáńgir hannyń tulǵasy, handyqtyń ishki ómiri men sol kezeńniń keıbir tarıhı sátteri týraly bolmaq. Keshe shyǵarmashylyq toppen arnaıy kezdesip, túsirilim jumysyna tilektestik bildirdik», - dep jazdy Aqparat jáne qoǵamdyq damý mınıstri Aıda Balaeva Facebook-te.
Mınıstr QR Prezıdenti Qasym-Jomart Toqaev ulttyq kınoǵa, sonyń ishinde tarıhı týyndylarǵa erekshe kóńil bólý kerektigi týraly únemi sóz qozǵaıtynyn aıtyp ótti.
«Sebebi, kıno óneri – kórermenge tek bir sáttik qyzyqty dúnıe jasap shyǵý emes. Bul, eń birinshi kezekte, qoǵamnyń sanasyn jańǵyrtatyn ıdeologııalyq tárbıe quraly. Sondyqtan, búgingi Táýelsizdiktiń 30 jyldyǵy belesinde, egemen eldiń kózqarasymen ótken tarıhymyzdy qaıta túgendep, ásirese óskeleń urpaqqa ult tulǵalaryn tereń tanystyryp otyrýdyń mańyzy zor.
Kileń talantty óner maıtalmandarynyń qatysýymen túsiriletin telehıkaıa bıik talǵamdy kórermen qaýymnyń kóńilinen shyǵyp, qoǵam tarapynan zor yqylasqa ıe bolady dep senemin. Shyǵarmashylyq ujymǵa sáttilik tileımin!», - dedi Aıda Balaeva.