Janel Kýshýkova: EAEO elderine taýar eksportaıtyn shaǵyn kásipkerler kóp

NUR-SULTAN. QazAqparat – Eýrazııalyq ekonomıkalyq odaq elderine taýar eksporttaıtyn qazaqstandyq jetkizýshilerdiń basym bóligi – shaǵyn jáne orta bıznes ókilderi. Bul týraly Saýda jáne ıntegratsııa vıtse-mınıstri Janel Kýshýkova aıtty, dep habarlaıdy QazAqparat.

«EAEO naryqtarynaǵy negizgi qazaqstandyq jetkizýshiler – shaǵyn jáne orta bıznes kásiporyndary. Qazaqstannyń Tuńǵysh Prezıdenti – Elbasy 2050 jylǵa qaraı ShOB-tyń JІÓ-degi úlesin 50%-ǵa deıin jetkizýdi strategııalyq maqsat etip qoıǵan edi. Búginde ShOB-ty damytý – Úkimettiń negizgi tapsyrmalarynyń biri. Biz de Eýrazııalyq odaq jumysy aıasynda ýaǵdalasqan sharalarǵa osy mindetterdi qosamyz», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, ótken jyly EAEO-nyń taıaý jyldarǵa arnalǵan damý strategııasyn talqylaý kezinde birlesken ónerkásiptik kásiporyndar qurýǵa jáne múshe memleketterdiń ónerkásiptik sýbektileri arasyndaǵy baılanystardy nyǵaıtýǵa, EAEO naryǵyndaǵy kedergilerdi joıyp, ózara saýda kólemin ulǵaıtýǵa mán berilgen.

«EAEO iske qosylǵan 2015 jyldan beri odaq elderiniń qatysymen ashylǵan birlesken kásiporyndar sany 6272-den 13 503-ke deıin eki ese ósti. Biz ónerkásiptik kooperatsııany tereńdetýdi – EAEO-ny 2025 jylǵa deıin damytýdyń ortalyq elementi dep sanaımyz. 21 mamyrda ótetin Joǵary Eýrazııalyq ekonomıkalyq keńeste bizdiń prezıdentter ónerkásiptik yntymaqtastyqtyń negizgi baǵyttaryn qarastyrady. Eýrazııalyq ekonomıkalyq odaqtyń barlyq qatysýshylary ónerkásiptik yntymaqtastyqty taýarlardyń eksporttyq jelisin sapaly jaqsartý quraldarynyń biri retinde baǵalaıdy», - deıdi J. Kýshýkova.