Jandos Qııanov: Paralımpıada oıyndarynda basty maqsat – el úmitin aqtaý
Sonyń ishinde para dzıýdo sport túrinen 6 sportshy joldama utyp aldy. Eske sala keteıik, para dzıýdo sportymen kóz kórý qabileti nashar nemese kózi kórmeıtin sportshylar aınalysady.
Para dzıýdodan Qazaqstan Respýblıkasynyń Ulttyq qurama komandasynyń bas jattyqtyrýshysy Jandos Qııanov Paralımpıada oıyndarynyń aldynda sportshylardyń daıyndyǵy jóninde suhbat berdi.
- Tokıo-2020 Paralımpıada oıyndaryna Qazaqstan tarapynan qansha para dzıýdoshy qatysady?
- Alda kele jatqan Paralımpıada oıyndaryna elimizden 6 para dzıýdoshy qatysady. Olardyń qatarynda Janbota Amanjol (90kg), Temirjan Dáýlet (73kg), Ánýar Sarıev (60kg), Ǵalymjan Smaǵululy (81kg), Daıana Fedosova (57kg) jáne Zarına Baıbatına (+70kg) bar. Bular bizdiń myqty degen sportshylarymyz, árqaısysy halyqaralyq dodalardyń jeńimpazdary. Mysaly, Temirjan Dáýlet ótken jyly Tblısıde ótken Álem Kýboginiń jeńimpazy, Ánýar Sarıev Rıo paralımpıadasynyń qatysýshysy.
- Paralımpıada oıyndarynda qandaı nátıje kútesiz jáne kimge úmit artasyz?
- Bizdiń basty maqsatymyz - Qazaqstan Týyn kókke kóterip, elimizdiń Ánuranyn ózge elderdiń aldynda shyrqatý. Paralımpıada oıyndaryna joldama alýdyń ózi úlken mártebe. Osy oıyndarǵa joldama alý úshin sportshylarymyz talaı syndardan ótip, talaı dodalardan jeńip shyqty. Tek osy 2021 jyldyń jetistikterin alatyn bolsaq, Janbota Amanjol, Ǵalymjan Smaǵululy jáne Daıana Fedosova Ulybrıtanııada ótken Gran – Prı jarystaryna qatysyp, júldeli oryndarǵa ıe boldy. Baký qalasynda ótken Gran-Prıde Ánýar Sarıev pen Janbota Amanjol úzdik óner kórsetip qola júldelerge ıe boldy. Al, Zarına Baıbatına men Ǵalymjan Smaǵululy Antalııa qalasynda ótken halyqaralyq týrnırden altyn men kúmis medaldi qanjyǵasyna baılap ákeldi. Bul tek osy jyldyń iri jetistikteri ǵana. Jetistikterin aıta bersek tolyp jatyr. Sondyqtan aldaǵy Paralımpıada oıyndaryna árqaısysyna artatyn úmitim zor.
- Paralımpıada oıyndaryna sońǵy daıyndyq kezeńderi qalaı jáne qaıda ótip jatyr?
- Para dzıýdo qurama komandasy Tokıo-2020 Paralımpıada oıyndaryna qarqyndy daıyndyq jumystaryn ótkizýde. Biz qazir Almaty oblysynda para dzıýdoshylar men jattyqtyrýshylardy bir jerde jınap, oqý - jattyǵý jıyndaryn ótkizip jatyrmyz. Oqý – jattyǵý jıynyna kelgen boıda PTsR testin tapsyryp, úsh kúndik karantınde boldyq. Sportshylardyń densaýlyǵyna asa kóńil bólip, Covid-19 vırýsyna qarsy barlyq is-sharalardy qadaǵalap júrmiz. Paralımpıada oıyndaryna ama- esen baryp, úzdik óner kórsetý basty maqsatymyz.
- Paralımpıada oıyndarynda basty qarsylastarynyz kimder jáne qaı elden bolady?
- Qazirgi tańda para dzıýdo barlyq elderde qarqyndy damyp keledi. Sondyqtan bólip-jaryp eshkimdi ataı almaımyn. Jalpy, Paralımpıada oıyndaryna álemdik reıtıng boıynsha eń myqty degen sportshylar ǵana qatysatyny belgili, osaly joq. Doda tartysty bolary sózsiz. Eń bastysy, bizdiń sportshylar eshkimnen de kem emes jáne jospar boıynsha jaqsy daıyndalyp jatqandyǵyn ǵana aıta alamyn.
- Qazaqstandaǵy para dzıýdo jaǵdaıy qalaı? Elimizde para dzıýdomen aınalasatyndar sany kóp pe?
- Elimizde para dzıýdo salasy udaıy úrdispen damyp keledi. 2015 jyly Qazaqstan Para dzıýdo federatsııasy quryldy. Qazir para dzıýdomen elimizdiń 11 oblysy men 3 qalasynda 29 bapkerde 100-den astam sportshy daıyndalyp júr. Sportshylardyń jetistikteri aýyz toltyryp aıtarlyqtaı. Para dzıýdo sportynyń damýyn osy kele jatqan Paralımpıada oıyndaryna utyp alǵan joldama sany arqyly da kórýge bolady. 2016 jyly Rıoda ótken Paralımpıada oıyndaryna 2 palýanymyz barsa, Tokıo – 2020 oıyndaryna 6 palýan joldama aldy.
- Áńgimeńizge raqmet!