Jandarbek Bekshın Arbattyń qashan ashylatynyn aıtty

ALMATY. QazAqparat - Almaty qalasy sanıtarlyq-epıdemıologııalyq baqylaý departamentiniń bastyǵy, qalanyń bas memlekettik sanıtar dárigeri Jandarbek Bekshın onlaın brıfıng barysynda Arbattyń qashan ashylatynyn aıtty, dep habarlaıdy QazAqparat tilshisi.

Jandarbek Bekshın qala «qyzyl» aımaqta bolǵandyqtan, Arbatty jabý týraly sheshim qabyldanǵandyǵyn jetkizdi.

«Infektsııanyń taralýy jaǵdaılaryn toqtatý úshin biz Arbatty jaýyp tastadyq. Arbatta adam óte kóp jınalady. Bul turǵyndardyń ómirine qaýip tóndirdi. Epıdemıologııalyq jaǵdaı turaqtalyp, Almaty «qyzyl» aımaqtan shyǵatyn bolsa, Arbatty ashatyn bolamyz», – deıdi ol.

Sonymen qatar, ol Arbatta «Ashyq» jobasyn júzege asyrý qazir múmkin emes ekenin tilge tıek etti.

«Eger Arbatta bir-eki kireberis bolsa, «Ashyq» iske qosylýy múmkin edi. Dál qazir ony júzege asyrý múmkin emes. Qazir megapolıste «Ashyq» 1300 nysan tirkeldi. Jumys qyzý júrip jatyr», - dedi spıker.

Jandarbek Bekshın qaladaǵy saıabaqtar men skverler ashyq ekenin eskertti.