Jandarbek Bekshın Almatyda qatań shekteý sharalaryn engizý sebebin túsindirdi

ALMATY. QazAqparat - Almatynyń bas memlekettik sanıtarııa dárigeri Jandarbek Bekshın onlaın brıfıng barysynda jańa qaýlyny túsindirdi, dep habarlaıdy QazAqparat tilshisi.

«Tórtinshi tolqyn qaýpi tónip tur, oǵan delta shtamy sebep, ony úndi shtamy dep te ataıdy. Biz «jasyl» aımaqqa ótkende aýrý kórsetkishi táýligine 100 jaǵdaıǵa deıin tómendedi, biraq jańa shtamdarǵa baılanysty kúrt ósti. Úndi shtamynyń basqa mýtatsııalanǵan shtamdarmen salystyrǵanda patogendiligi joǵary. Osyǵan baılanysty qatań shekteý sharalaryn engizýge májbúr boldyq», - dedi Bekshın.

Qoǵamdyq tamaqtaný nysandary qyzyl aımaq talaptary boıynsha jumys isteýi tıis, saǵat 7.00-den 20.00-ge deıin jumys isteýge ruqsat. Jumys kúnderi tolymdyǵy 50 paıyz, biraq 30 orynnan aspaýy tıis, al senbi men jeksenbi kúnderi tyıym salynady. Biraq jetkizý qyzmetine ruqsat etiledi. Al Ashyq qatysýshylary túngi saǵat 2-ge deıin jumys isteı alady, olarda tolymdyq 50 paıyzǵa deıin, biraq 50 orynnan artyq emes.

Ashyq-qa qatyspaıtyn banket zaldary jumys isteı almaıdy. Al Ashyq músheleri túngi saǵat 2-ge deıin jumys isteıdi, biraq adam sany 3-dan aspaýy tıis. Eske alýdan basqa ujymdyq is-sharalarǵa tyıym salynady.

Monshalar barlyq kúni jumys isteıdi. Saýnalar, spa-ortalyqtar, basseınder tek jumys kúnderi isteıdi. Al Ashyq músheleri óz rejımi boıynsha.

Kınoteatrlar men teatrlarǵa tyıym salynady. Tek Ashyq júıesimen tolymdyǵy 30 paıyzdan artyq bolmaǵan jaǵdaıda jumys isteýge bolady.

Bılıard, kompıýterlik klýbtar Ashyq-syz jumys istemeýi kerek.

Aıta keteıik, Almatynyń bas sanıtarııa dárigeri Jandarbek Bekshın 26 maýsymda jańa qaýlyǵa qol qoıǵan bolatyn. Qaýlyǵa sáıkes qalada jappaı betperde taǵý rejımi engiziledi.

Qaýly 28 maýsymnan bastap kúshine endi.