Jańbyr, burshaq, jel: 15 maýsymǵa arnalǵan aýa raıy boljamy

<p>ASTANA. KAZINFORM &ndash; Atmosferalyq fronttardyń ótýine baılanysty 15 maýsymda elimizdiń basym bóliginde aýa raıy qubylmaly bolady.&nbsp;</p>

«Qazgıdromet» RMK málimetinshe, respýblıkanyń shyǵysynda jáne ortalyǵynda kún kúrkirep, burshaq, nóser jańbyr jaýady.

Elimizdiń batysy men ońtústiginde ǵana jaýyn-shashynsyz aýa raıy saqtalady. Respýblıka boıynsha jel kúsheıedi, túnde soltústikte tuman túsedi.

Batys Qazaqstan, Atyraý, Aqtóbe, Mańǵystaý, Qostanaı oblystarynda kúndiz qatty ystyq bolady.

Ulytaý, Jambyl, Almaty oblystarynda, Batys Qazaqstanda, Aqtóbe oblysy ortalyǵynda, Mańǵystaý oblysynyń jaǵalaýynda, Aqmola oblysynyń ońtústik-batysynda, Jetisý oblysynyń batysynda, Abaı oblysynyń ortalyǵynda, ońtústiginde, Qaraǵandy oblysynda, Qostanaı, Shyǵys Qazaqstan oblystarynyń ońtústiginde, Qyzylorda oblysynyń soltústik-batysynda, shyǵysynda joǵary órt qaýpi saqtalady.

Atyraý, Mańǵystaý, Túrkistan, Qyzylorda oblystarynda, Batys Qazaqstannyń batysynda, Aqtóbeniń ońtústiginde, batysynda, shyǵysynda, Jambyldyń ońtústiginde, Almaty oblysynyń ortalyǵynda, Qostanaı, Qaraǵandy ​​oblystarynyń ońtústiginde, Jetisý oblysynyń shyǵysynda tótenshe órt qaýpi bar.