Jánibek Álimhanulynyń rıngke qashan oralatyny belgili boldy

<p>ASTANA. KAZINFORM —  WBO jáne IBF tujyrymy boıynsha orta salmaqtaǵy álem chempıony Jánibek Álimhanuly (15-0, 10 KO) ESNews arnasyna bergen suhbatynda jazdyń ortasynda Las-Vegasta rıngke shyǵýdy josparlap otyrǵanyn rastady.</p>

Buǵan deıin amerıkalyq ınsaıderler «Qazaq staıldyń» jańa jekpe-jegi jańazelandııalyq mindetti qarsylas Andreı Mıhaılovıchpen (21-0, 13 KO) bolatynyn jazǵan. 

Telearnaǵa suhbatynda Jánibek qarsylasynyń atyn atamaı, jekpe-jek ótetin kúndi ǵana jarııalady.

«13 shilde kúni Las-Vegastaǵy Palm Casino Resort kesheninde ótedi», — dedi Jánibek Álimhanuly.

Eske sala keteıik, Jánibek Álimhanulynyń sońǵy aıqasy ótken jyldyń qazan aıynda bolǵan.

Ol nemis boksshysy Vınchentso Gýaltıerıdi (22-1-1, 7KO) merziminen buryn jeńip, odan IBF tıtýlyn tartyp alǵan edi.  

26 jastaǵy Andreı Mıhaılovıch mansabynda alǵash ret Jańa Zelandııadan tys jerde óner kórsetedi. 

Ol Álimhanulymen jekpe-jekti IBF tıtýlyna resmı úmitker retinde qabyldady.

Mıhaılovıch — Reseı týmasy, ony egiz baýyrymen birge Jańa Zelandııadan kelgen erli-zaıyptylar bir jarym jasynda asyrap alǵan.