Jánibek Álimhanuly: Sıdneıde kók týymyzdy taǵy bir jelbiretkim keledi

<p>ASTANA.KAZINFORM - Orta salmaqta WBO jáne IBF tıtýldarynyń ıegeri, qazaqstandyq kásipqoı boksshy Jánibek Álimhanuly (15-0, 10 KO) chempıondyq ataǵyn qorǵaý úshin Sıdneı (Avstralııa) qalasyna keldi.</p>

Jekpe-jek aldyndaǵy baspasóz máslıhatynda Jánibek qazaq boksshylarynyń Sıdneıde atoı salǵan jarqyn sátterin eske aldy.

- Sıdneıde ótken Olımpıada oıyndarynda eki qazaq boksshysy altyn jeńip aldy. Bekzat Sattarhanov pen Ermahan Ibragımov talaı qazaqty shabyttandyrdy. Men de solar sııaqty elimniń abyroıyn asqaqtatýdy armandap óstim. Sıdneıde bokstasatynyma óte qýanyshtymyn. Men 2000 jylǵy Olımpıada chempıondary sııaqty Sıdneıde óz týymdy álemge taǵy bir ret kórsetkim keledi, - dedi qazaq boksshysy.

Otandasymyz qarsylasyn jeńetinine senimdi ekenin aıtty.

- Andreımen jekpe-jek men úshin óte mańyzdy. Óıtkeni ol meniń ataǵyma resmı úmitker. Ol qazir men úshin bult sııaqty. Kúndi kórý úshin tez bulttan qutylýym kerek. Onyń men úshin ońaı jumys ekenin bári biledi jáne túsinedi. Men ony tez nokaýtqa túsiremin, - dedi Jánibek.

Aıta keteıik, Jánibek - Andreı jekpe-jekgi No Limit Boxing promoýterlik kompanııasynyń uıymdastyrýymen 4 qazan kúni Avstralııanyń Sıdneı qalasyndaǵy The Star arenasynda ótedi. 
Boksshylar IBF álem chempıony ataǵy úshin judyryqtasady.

Eske sala ketsek, eki boksshy arasyndaǵy aıqas 13 shilde kúni Las-Vegaste (AQSh) ótýi tıis edi. Alaıda, otandasymyz salmaq qýý saldarynan esinen tanyp qalǵan bolatyn.