Jánibek Álimhanuly kásipqoı boksta jeńilip kórmegen álem chempıonymen aıqasady

<p>Qazaqstandyq boksshy Jánibek Álimhanuly sporttyq mansabynda alǵash ret basqa álem chempıonymen birikken jekpe-jek ótkizedi. Orta salmaqtaǵy WBO chempıonynyń qarsylasy IBF belbeýiniń ıegeri, germanııalyq Vınchentso Gýalterı bolmaq.</p>

Kazinform bul týraly Sports.kz saıtyna silteme jasap habarlaıdy.

30 jastaǵy Álimhanuly kásipqoı boksta 14 aıqas ótkizip, bárinde jeńiske jetken, 10 ret qarsylasyn nokaýtqa túsirgen. Ol 2022 jyldyń 5 mamyrynda brıtandyq Dennı Dıgnýmdy nokaýtqa jiberip, álem chempıony atanǵan bolatyn. Qazaqstandyq boksshy tıtýlyn eki ret qorǵady: birinshisinde tóreshiler sheshimimen brıtandyq Denzel Bentlıden basym tússe, ekinshisinde kanadalyq Stıven Batlerdi nokaýtpen jeńdi.

Gýalterıdiń de jasy 30-da, ol da kásipqoı boksta jeńilip kórmegen. Onyń qorjynynda 21 jeńis (7 nokaýt) pen bir teń esep bar. Ol 1 shildede Brazılııa ókili, 2012 jylǵy Olımpıada fınalısi Eskıva Falkaony sensatsııamen jeńip, tıtýl ıegeri atanǵan bolatyn. Aldaǵy jekpe-jek germanııalyq boksshynyń AQSh-taǵy debıýti bolmaq.

Álimhanuly-Gýalterı aıqasy – Rozenbergtegi (Tehas shtaty) Fort Bend Community Center arenasyndaǵy boks keshiniń negizgi oqıǵasy. Jekpe-jek Astana ýaqytymen 15 qazan tańerteń ótedi. Qazsport telearnasy Álimhanuly-Gýalterı boks keshin 6:00-den bastap tikeleı efırde kórsetedi, basty jekpe-jek qatysýshylary rıngke 9:00-den keıin shyǵady.