Jańajyldyq táttilerdi ázirleý kezinde neni eskerý kerek

KÓKShETAÝ. QazAqparat - Aqmola oblysynyń bas memlekettik sanıtarlyq dárigeri Aınagúl Mýsına jýrnalıstermen ótken brıfıngte jańajyldyq táttilerdi daıyndaý kezinde qandaı erejeler men talaptardy saqtaý kerektigin aıtty, dep habarlaıdy QazAqparat tilshisi.

Óńirdiń bas memlekettik sanıtarlyq dárigeriniń aıtýynsha, jańajyldyq tátti syılyqtardy uıymdastyrylǵan saýda oryndarynda (dúkender, saýda bazalary, resmı bazarlar) satyp alý qajet. Qaptamasy berik, tyǵyz jabylǵan, deformatsııalanbaǵan, sondaı-aq ishindegisi syrtqy áserlerden jaqsy qorǵalǵan bolýy kerek.

«Jaramdylyq merzimin tekserińiz, jaramdylyq merzimi aıaqtalýǵa jaqyn táttilerdi satyp almaǵanyńyz jón. Quramynda konservanttar, aspazdyq jáne kondıterlik maılar, soıa ónimderi, hosh ıister, táttilendirgishter eń az jıyntyqtardy tańdańyz. Kondıterlik ónimderde alkogol, tabıǵı kofe, balalarda allergııalyq reaktsııa týdyrýy múmkin basqa komponentter bolmaýy kerek», - dep túsindirdi Aınagúl Mýsına.

Maman tez buzylatyn taǵamdardy – súzbe irimshikterin, ıogýrttardy, torttardy nemese krem toltyrylǵan pechenelerdi syılyqqa salmaýǵa keńes beredi. Osy rette, syılyq úshin úıde jáne frýktoza men qant almastyrǵyshtardan jasalǵan túrli táttilerden bas tartyp, jyltyratylǵan marmelad, zefırdi jáne shokoladty az mólsherde salǵan jón.

Shokoladtyń quramynda palma maıy bolmaýy kerek. Pechene tańdaýǵa keletin bolsaq, kalorııaly, maıly jáne tátti emes, dıetalyq – galet, suly unynan jasalǵan ónimdi tańdaǵan durys.

«Kondıterlik ónimderdi jıi paıdalaný tis karıesine, atopııalyq dermatıttiń (dıatezdiń) kórinisterine, allergııalyq reaktsııalarǵa ákelýi múmkin. Pechene, frýtıladtarǵa (jemis batonchıkteri) jáne keptirilgen jemisterden jasalǵan kámpıtterge, kozınaktarǵa, gematogenge, vaflıge, pastılge, marmelad pen zefırge, shaınaıtyn marmeladqa (az mólsherde), keptirilip oralǵan jemister men jańǵaqtarǵa artyqshylyq bergen abzal. Tátti syılyq retinde jemister óte jaqsy: alma, almurt, mandarın, apelsın, banan. Mandarınder men apelsınderdi ekiden artyq qospaǵan durys ekenin eskerińiz. Óıtkeni tsıtrýs jemisterin kóp qoldaný balada allergııa týdyrýy múmkin, tipti olar buryn allergııa bolmasa da», - dep túıindedi Aınagúl Mýsına.

Óńirdiń memlekettik sanıtarlyq dárigeri atap ótkendeı, atalǵan erejelerdi saqtaý arqyly jańajyldyq táttilerdi qaýipsiz daıyndaýǵa jáne balalarǵa keremet kóńil-kúı syılaýǵa múmkindik beredi.

Aıta ketsek, Aqmolada 14 jasqa deıingi balalar arasynda COVID juqtyrý ósken.