Jańatas, Qarataý jáne Shý qalalarynda jataqhanalar salynady
Páter kiltin ıelengender qatarynda Uly otan soǵysynyń ardageri, jetim balalar, áleýmettik az qamtylǵandar, memlekettik jáne bıýdjettik uıym qyzmetkerleri bar.
«Oblys kóleminde árbir mereke qarsańynda jańa nysandardy paıdalanýǵa berý, halyqqa páter kiltin tabystaý sııaqty ıgi sharalar dástúrge aınaldy. 8 naýryz merekesine Jańatas qalasynda 60 otbasyna páter kilti tapsyrylsa, 1 mamyr merekesine oraı Taraz jáne Qarataý qalalarynda 120 páter tapsyryldy. Onyń ishinde, 57 páter kópbalaly otbasyna berildi. Búgin osy úrdis jalǵasyp, taǵy 80 páter berilgeli otyr. Onyń ishinde 35 páter kópbalaly otbasyna bólindi»,- dedi oblys ákimi óz sózinde.
Paıdalaýnǵa berilgen turǵyn úı «Nurly jer» baǵdarlamasy aıasynda 2018 jyly turǵyzylǵan. Qurylysyn merdiger «Agrospetsstroı» JShS-gi júrgizgen. Turǵyn úı áleýmettik jaǵynan qorǵalǵan toptardyń azamattaryna jekeshelendirý quqyǵynsyz beriledi jáne arendalyq aılyq tólem kólemi 5500-6000 teńge kóleminde belgilengen.
Sondaı-aq, Elbasy Nursultan Ábishuly Nazarbaevtyń «Nur Otan» partııasynyń HVІІІ sezinde bergen tapsyrmasy aıasynda bólingen qarjy esebinen oblys boıynsha 187 otbasyna baspana alyp berý josparlanyp otyr. Sonymen qatar, turǵyn úı kezegi jetkenshe kópbalaly otbasylaryn jataqhanalarmen qamtý jumystary da qolǵa alynǵan. Bul jumystarǵa jergilikti bıýdjetten 2,6 mlrd. teńge baǵyttalyp, Taraz, Jańatas, Qarataý jáne Shý qalalarynda baspanaǵa muqtaj dep anyqtalǵan osy sanattaǵy 612 otbasyna jataqhanalar salynady.
Aıta keteıik, jalpy búginde Jambyl oblysy boıynsha páter alý úshin kezekte 24 533 adam tursa, onyń 14 046-y halyqtyń osal tobyn jatatyndar. Aǵymdaǵy jyly «Nurly jer» baǵdarlamasy aıasynda óńirde 12,1 mıllıard teńgege 2 118 kóppáterli 30 turǵyn úıdiń qurylysy júrgizilip, 1 988 páterli 28 úı paıdalanýǵa berý josparlanǵan.