Janat Nurmaǵambetova BQO bala quqyqtary jónindegi ýákili bolyp taǵaıyndaldy
Oblys ákiminiń orynbasary Baqytjan Narymbetov kámeletke tolmaǵandardyń isteri jáne olardyń quqyqtaryn qorǵaý jónindegi oblystyq komıssııa múshelerine jańa ýákildi tanystyrdy.
Baqytjan Haberuly óz sózinde Janat Jandollaqyzynyń qadaǵalaý salasynda — QR Bas prokýratýrasy quqyqtyq statıstıka jáne arnaıy esepke alý komıtetiniń BQO boıynsha basqarmasynda túrli basshylyq laýazymdarda qyzmet atqarǵan tájirıbeli tulǵa ekenin jetkizdi.
«Janat Jandollaqyzy óziniń eńbek jolyn mektepte bastaǵan, ıaǵnı jas urpaqtyń tárbıesin jaqsy biledi. Aǵa ádilet keńesshisi degen sheni men kóshbasshylyq qabileti bar myqty uıymdastyrýshy. Onyń belsendi ustanymy óńir turǵyndaryna jaqsy tanys. Ol — sybaılas jemqorlyqqa qarsy is-qımyl jónindegi óńirlik komıssııa, oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııa, ana men balany qoldaýdy, jasóspirimderdi tárbıeleýdi, olardyń quqyqtaryn qorǵaýdy qosa alǵanda, ózekti máseleler kóteriletin ádep jónindegi tártiptik keńestiń otyrystaryna turaqty qatysqan jan. Ár ýaqytta QR Balalardyń quqyqtaryn qorǵaý komıteti janyndaǵy oblystyq balalar quqyqtaryn qorǵaý departamentiniń áleýmettik jobalaryn iske asyrýǵa da atsalysty», — dedi B.Narymbetov.
Jıyn barysynda Baqytjan Narymbetov oblystyń balalar quqyqtary jónindegi ýákiline Memleket basshysy belgilegen mindetterdi iske asyrýǵa jete kúsh salýy qajet ekenin atap ótti.
«Janat Jandollaqyzy óńir balalarynyń qaýipsizdigin qamtamasyz etý, býllıngtiń aldyn alý, qajetti áleýmettik súıemeldeýdi qamtamasyz etý jáne balalardyń quqyqtaryn qorǵaýdyń basqa da mańyzdy baǵyttar boıynsha belsendi jumys isteý sharalaryn uıymdastyrýy tıis», — dep qosty B.Narymbetov.
Eske sala keteıik, budan buryn Oralda býllıngke baılanysty mektep dırektory qyzmetinen bosatylǵanyn jazǵan bolatynbyz.