Jańartylatyn energııa kózderine tarıf tómendedi - mınıstr

NUR-SULTAN. QazAqparat – Aýktsıondar júıesi jańartylatyn energııa kózderine baǵanyń aıtarlyqtaı tómendeýine qol jetkizýge múmkindik berdi. Bul týraly Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Jıyntyq qýaty 1,5 GVt jańartylatyn energetıka jobalary úshin 2018-2020 jyldardaǵy halyqaralyq aýktsıondyq saýda - sattyq elektrondyq formatta ótkizildi. Sonyń ishinde 25 aýktsıon sátti ótkizildi (2018 jyly – 13 aýktsıon, 2019 jyly – 6 aýktsıon, 2020 jyly – 6 aýktsıon). Saýda-sattyqqa 12 elden, ıaǵnı Qazaqstan, Qytaı, Reseı, Túrkııa, Germanııa, Frantsııa, Bolgarııa, Italııa, Birikken Arab Ámirlikteri, Nıderlandy, Malaızııa, Ispanııa elderinen 172 kompanııa qatysty», - dedi mınıstr.

Aýktsıondyq saýda-sattyq qorytyndylary boıynsha 58 kompanııa jańartylatyn energııa kózderi elektr energııasyn biryńǵaı satyp alýshymen (Qarjy-esep aıyrysý ortalyǵymen) jıyntyq qýaty 1219 MVt-qa 15 jylǵa arnalǵan kelisimsharttarǵa qol qoıdy.

«Aýktsıondyq júıe «jasyl ekonomıka» qaǵıdatyna sáıkes júzege asyrylatyn jobalar baǵasynyń aıtarlyqtaı tómendeýine qol jetkizýge múmkindik berdi. Jekelegen jobalar boıynsha tarıfterdiń barynsha tómendeýi kún elektr stantsııalary úshin – 64%, jel elektr stantsııalary úshin– 30% jáne gıdro elektr stantsııalary úshin 19 paıyzdy qurady», - dedi N. Noǵaev.