Jańartylatyn energııa kózderin júıege qosý tarıfti ósirýi múmkin – Bolat Aqsholaqov

ASTANA. QazAqparat – QR Energetıka mınıstri Bolat Aqsholaqov Úkimet otyrysynda jańartylatyn energııa kózderin energetıka júıesine qosý tarıfke áser etetinin aıtty, dep habarlaıdy QazAqparat tilshisi.

«Jańartylatyn energııa kózderinen alynatyn energııa qýatyn saqtaý jáne bólý júıesin damytý boıynsha qandaı sharalar qabyldanyp jatyr?» dep surady Úkimet basshysy Álıhan Smaıylov.

Energetıka mınıstri Bolat Aqsholaqovtyń aıtýynsha, búgingi tańda jańartylatyn energııa saqtaý maqsatymen birqatar elder jumys istep jatyr.

«Ókinishke qaraı, bul saladaǵy tehnologııalar áli jetkilikti damyǵan joq. Sonda da Birikken Arab Ámirlikteri jáne Frantsııa kompanııalarymen kelissóz júrgizip, bolashaqtaǵy stansalardy osyndaı energııa qýatyn saqtaıtyn qondyrǵylarmen jabdyqtaý máselesin talqylap jatyrmyz», - dedi vedomstvo basshysy.

Mınıstr jańartylatyn energııany jınaqtaıtyn qondyrǵylardy júıege engizý tarıfterdi qymbattatýy múmkin ekenin eske saldy.

«Ókinishke qaraı, ol tarıfterdiń qosymsha ósýine áser etýi múmkin. Sondyqtan biz bolashaqtaǵy stansalardy tehnologııa damıtyn bolsa ǵana qoldanýymyz múmkin. Al qazir ony muqııat qarastyryp jatyrmyz. Biraq sonda da ózimizdiń qaraýymyzdaǵy uıymdardyń jumysynyń tizimine kirgizdik. Bul ǵylymı zertteý jumystaryn jalǵastyrýǵa múmkindik beredi. Qazirgi tańda sheteldik tehnologııalardy jáne ózimiz jaǵynan damytýǵa bolatyn tehnologııany eki jaqtan qarastyryp jatyrmyz», - dedi Bolat Aqsholaqov.