Janarmaıdyń ishki naryǵyn zań júzinde qorǵaý qajet – Ahmetjan Esimov

ATYRAÝ. QazAqparat – Atyraýda ótken Qazaqstan munaıynyń 120 jyldyǵyna arnalǵan keńeste «Samuryq-Qazyna» UÁQ» AQ Basqarma tóraǵasy Ahmetjan Esimov birqatar túıitkildi máselelerdi atap ótti, dep habarlaıdy QazAqparat tilshisi.

«Búginde Qazaqstanda janar-jaǵarmaı baǵasy kórshiles ózge memlekettermen salystyrǵanda eki ese arzan. Nátıjesinde kóleńkeli eksport týyndaıdy – jaǵarmaı ketip jatyr, odan elde tapshylyq bolýda. Janar-jaǵarmaıdyń irgeles naryqtarǵa jylystaýyn boldyrmaý úshin zańnamalyq deńgeıde qorǵanys mehanızmi qajet. Osylaısha, jergilikti naryqty qorǵaı alamyz», - dedi Ahmetjan Esimov.

Onyń aıtýynsha, ıkemdi salyq saıasatyn qajet etip otyrǵan tozǵan ken oryndarynyń problemasy da zańnamalyq qoldaýǵa muqtaj.

«Reseı buǵan kóship úlgerdi. Onda qıyn tabylatyn munaıdy óndirý búginde tıimdi bolyp otyr», - dep qosty A.Esimov.

Kompanııa basshysy atap ótkendeı, jańa ken oryndarymen salystyrǵanda eski ken oryndaryndaǵy jumysshylar sany áldeqaıda kóbirek.

Aıta keteıik, Atyraýda Prezıdent Qasym-Jomart Toqaevtyń tóraǵalyǵymen munaı-gaz salasyn damytý máselelerine arnalǵan keńeıtilgen keńes ótti.