Janarmaıdy az tutynatyn avtokólikke kóshýge yntalandyratyn baǵdarlama jasalady

ASTANA. QazAqparat - Kelesi jyly Energetıka mınıstrligi energııa únemdeýge arnalǵan baǵdarlama ázirleýdi josparlaıdy. Ondaǵy baǵyttyń biri avtokólikterdi benzınniń ornyna suıytylǵan gazǵa kóshirý men shaǵyn dvıgateldi kólikterge jurtshylyqty yntalandyrý bolyp otyr. Búgin Májilistegi «Nur Otan» partııasy fraktsııasynyń otyrysynda Energetıka vıtse-mınıstri Uzaqbaı Qarabalın osylaı málimdedi.

«Energetıka mınıstrliginiń múddeli memlekettik organdarmen birlese ázirlep jatqan baǵdarlamasyn júzege asyrý elimizdegi avtoparkterdi jańǵyrtýǵa yntalandyrady. Sonymen qatar baǵdarlama suıytylǵan gazǵa kóshý esebinen munaı ónimin tutyný mólsherin azaıtyp, shaǵyn dvıgateldi avtomobılderdiń sanyn arttyrýǵa septigin tıgizedi, elimizdiń ekologııalyq jaǵdaıyn jaqsartady. Bul shara sonymen birge Qazaqstannyń «jasyl» ekonomıkaǵa kóshý saıasatynda úlken ról oınap, ekologııa máselelerin sheshýde qomaqty úles qospaq», - dedi vıtse-mınıstr.

Onyń aıtýynsha, elimizdegi energoúnemdeý áleýeti bastapqy energetıkalyq resýrstardyń jalpy tutyný mólsheriniń shamamen 27 paıyz deńgeıinde baǵalanady.

«Bul 62 mln. tonna munaıdyń ekvıvalentin quraıdy, onyń ishinde 10 mln. tonnasy tasymaldaýdyń esebinen bolyp tur», - deıdi Uzaqbaı Qarabalın.