Janarmaı beketin tonaǵandar shetelde tirkelgen kólikpen júrgen – Atyraý polıtsııasy

ATYRAÝ. QazAqparat – Atyraýda janar-jaǵarmaı quıý stansasyna qaraqshylyq shabýyldyń mán-jaıy jarııalandy, dep habarlaıdy QazAqparat tilshisi.

«Sotqa deıingi tergeý barysynda belgili bolǵandaı, er adamdar 9 qańtar kúni Datov kóshesiniń boıyndaǵa janarmaı quıý stansasyn tonaýdy aldyn ala josparlaǵan. Qylmystyq top shet memlekette esepte turǵan Lada21101 kóligimen júrgen. Kúdiktiler iri somany ıemdengen jaǵdaıda shetel asyp ketýdi oılaǵan. Kólikte sheteldik nómirdiń bolýy jáne onyń Qazaqstanda esepte turmaýy tergeýdi qıyndata túsken. Alaıda, vıdeobaqylaý kameralarynyń arqasynda jedel qyzmetkerler tonaýshylardyń izine túsip, bir táýlik ishinde qolǵa túsirdi. Kóliktiń salonynan aqsha, travmatıkalyq tapansha, betperdeler tabyldy. QR QK 192-baby 2-bóligi «Qaraqshylyq» boıynsha sotqa deıingi tergeý jumystary júrip jatyr», - dedi óńirlik Polıtsııa departamentiniń baspasóz qyzmetinen.

Eske salaıyq, Atyraýdaǵy S.Datov kóshesinde ornalasqan janarmaı beketine 9 qańtar kúni tańǵy 05.40 shamasynda qaraqshylyq shabýyl jasalǵan edi. Janarmaı beketine basa kóktep kirgen belgisiz ekeý kúsh qoldaný arqyly kúzetshi men kassırdi qorqytqan. Jalpy somasy 268 myń teńgeni alyp, oqıǵa ornynan boı tasalaǵan. Qylmys izi sýymaı ashyldy. Oqıǵaǵa qatysty 1994 jáne 1995 jyldary týǵan eki kúdikti ustaldy.

Avtory: A. Sokolov