Janar-jaǵarmaıdyń jasandy tapshylyǵynyń aldyn alý úshin munaı bazalary tekseriledi

ASTANA. QazAqparat – Óńirlik shtabtar janar-jaǵarmaıdyń jasandy tapshylyǵynyń aldyn alý úshin munaı bazalaryna tekserý júrgizedi. Premer-Mınıstrdiń birinshi orynbasary Roman Sklıardyń tóraǵalyǵymen ótken janar-jaǵarmaı naryǵyndaǵy ahýal boıynsha keńeste osyndaı tapsyrma berildi, dep habarlaıdy QazAqparat.

Energetıka mınıstrliginiń aqparatyna sáıkes, eldegi dızel otynynyń jıyntyq qory – 308,56 myń tonna, bul – 2023 jylǵy 1 qańtardaǵy qormen salystyrǵanda 59 myń tonnaǵa artyq.

Keıbir óńirlerdegi jekelegen janarmaı quıý stantsııalarynda dızel otynyn satýda shekteýler baıqalǵan. Osyǵan baılanysty janar-jaǵarmaı ishki naryǵyn qamtamasyz etý úshin:

- Óńirlik shtabtarǵa janar-jaǵarmaıdyń jasandy tapshylyǵyn týdyrmaý maqsatynda óńirlik munaı bazalaryn komıssııalyq tekserý jóninde sharalar qabyldaý;

- Zań buzýshylyq faktileri bolǵan jaǵdaıda tıisti memlekettik organdarǵa naryq sýbektileriniń básekelestikke qarsy nemese domınantty áreketteri boıynsha tergeý júrgizý tapsyryldy.

Aıta ketsek, óńirlik shtabtar quramyna jergilikti atqarýshy organdar, básekelestikti qorǵaý jáne damytý, memlekettik kirister, ekonomıkalyq tergeý jáne tabıǵı monopolııalardy retteý departamentteri kiredi.