Janar-jaǵarmaıdy elden syrtqa shyǵarýǵa qatań tosqaýyl qoıylady

ASTANA. QazAqparat - Qazaqstannan janar-jaǵarmaıdyń zańsyz shyǵarylýyna tosqaýyl qoıý úshin eksporttyq baqylaý beketteri qoıylady. Bul týraly Parlament Senaty Ekonomıkalyq saıasat, ınnovatsııalyq damý jáne kásipkerlik turaqty komıtetiniń keńeıtilgen otyrysynda QR Energetıka vıtse-mınıstri Bolat Aqsholaqov málim etti, dep habarlaıdy QazAqparat.

Otyrys barysynda senatorlar Qazaqstan men Reseı shekarasynan janar-jaǵarmaıdyń zańsyz tasymaldaný faktileri qanshalyqty jıi kezdesetinin surady.

«Esepteýler boıynsha RF-pen salystyrǵanda elimizde benzın men dızel otynynyń baǵasy arzandaý. Mysaly, Qazaqstanda AI-92 benzıniniń lıtri 153 teńge bolsa, Reseıde 240 teńge shamasynda. Bul turǵyda elderdiń shekarasy arasynda kedendik baqylaý joq ekenin bilesizder. Sol sebepti benzın syrtqa shyǵyp ketýi múmkin», - dedi vıtse-mınıstr.

Osy oraıda ol janar-jaǵarmaıdyń shekara asyp ketýine tosqaýyl qoıý úshin tıisti buıryq daıyndalǵanyn da jetkizdi.

«Bul buıryq boıynsha dızel otynyn bizdiń shekaradan alyp shyǵarýǵa tyıym salýdy kózdeıdi. Ekinshiden, Qarjy mınıstrligindegi áriptesterimiz osy jyldan arnaıy eksporttyq baqylaý beketterin qoıýdy pysyqtaýda. Osy rette janar-jaǵarmaı tasymaldaıtyn tsısternaly kólikti tekserýge múmkindik beriledi. Qazirgi ýaqytta shekarada turatyn bizdiń ofıtserlerdiń tekseretin quqyqtary joq», - dep naqtylady Bolat Aqsholaqov.