Janar-jaǵar maı baǵasy baqylaýda – Bolat Aqsholaqov

ALMATY. QazAqparat – Munaı ónimderin bólshek saýdada ótkizý máselesi, naqtyraq aıtqanda janar-jaǵar maı baǵasy baqylaýda. Bul týraly brıfıng barysynda QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

Mınıstrdiń aıtýynsha, búginde AI-92 benzıniniń ortasha quny – 181, AI-95 – 213, dızel otyny – 230 teńge.

«Biz otyn taratý júıesin jetildirýdi, baǵa belgileýmen aınalysatyn ónimsiz deldaldardy joıýdy usynamyz. Olar – munaı óńdeýge de, ony tasymaldaýǵa da qatyspaıtyndar, sondaı-aq burynǵydaı munaı bazalary, janar-jaǵar maı quıý stantsııalary joqtar», - dedi energetıka mınıstri.

Sonymen qatar, ol 180 kúndik moratorııden keıin baǵanyń kúrt ósýine jol bermeý úshin energetıka mınıstrligi memlekettik kirister komıtetimen birlesip, suıytylǵan munaı gazynyń ishki naryqtaǵy aınalymyn baqylaýǵa alǵanyn atap ótti.

Bolat Aqsholaqov AI-92 jáne AI-93 benzın suryptarynyń baǵasy jappaı qatty kóterilmeıtinin, óıtkeni mınıstrlikte bul másele zańnamaǵa túzetýler engizilgenge jáne deldaldardy alyp tastaǵanǵa deıin retteletindigin tilge tıek etti.

«AI-95, AI-96 jáne AI-98 premıým markaly benzınge keletin bolsaq, onyń baǵasy negizsiz óspeıdi. Bul dızeldik otynǵa da qatysty. Bul kúzgi jınaý naýqany oıdaǵydaı ótýi úshin jasalyp otyr», - dedi mınıstr.

Sonymen qatar, energetıka mınıstri munaı ónimderin avtomobılmen eksporttaýǵa tyıym salý 6 aıǵa uzartylǵanyn eske saldy.