Janar Aıtjanova Halyqaralyq elektrbaılanys odaǵynyń Bas hatshysymen kezdesti

NUR-SULTAN. QazAqparat - Qazaqstan Respýblıkasynyń Jenevadaǵy BUU bólimshesi jáne basqa da halyqaralyq uıymdar janyndaǵy Turaqty ókili Janar Aıtjanova Halyqaralyq elektrbaılanys odaǵynyń (HEO) Bas hatshysy Hoýlın Chjaonyń Qazaqstanǵa sapary qarsańynda kezdesý ótkizdi, dep habarlaıdy QR SІM baspasóz qyzmeti.

Qazaqstandyq taraptyń shaqyrý negizine baılanysty ú.j. 16-17 qyrkúıek aralyǵynda HEO-nyń Bas hatshysy Baılanys salasyndaǵy aımaqtyq dostastyq ákimshiligi basshylarynyń Keńesiniń (BSAD ÁK) 55-shi otyrysyna jáne TMD-ǵa múshe memleketterdiń aqparattandyrý jónindegi Úılestirý keńesiniń 25-shi otyrysyna qatysady. Іs-sharalar aıasynda H.Chjaonyń joǵary deńgeıdegi resmı ókildermen birqatar ekijaqty kezdesýler josparlanǵan.

Kezdesý barysynda Qazaqstannyń Turaqty ókili Prezıdent Qasym-Jomart Toqaevtyń Joldaýynyń aqparattyq-kommýnıkatsııalyq tehnologııalar (AKT) salasyndaǵy negizgi aspektilerin, sonyń ishinde ınfokommýnıkatsııalyq ınfraqurylymdy damytý turǵysynan aımaqtaǵy kóshbasshylyqty nyǵaıtý mindetin atap ótti. Sondaı-aq, HEO Bas hatshysynyń Qazaqstanǵa sapary yntymaqtastyqty odan ári nyǵaıtýǵa jáne birlesken jobalardy júzege asyrýǵa serpin beretinine senim bildirdi.

Óz kezeginde, H.Chjao Memleket basshysynyń Qazaqstan halqyna Joldaýynda júktelgen mindetter Qazaqstanda AKT-ǵa halyqaralyq ınvestıtsııalardy yntalandyratyndyǵyn jáne bizdiń elimizdi álemdik damýdyń jańa satysynda qazaqstandyq model retinde kórsetetindigin atap ótti. Sonymen qatar, HEO-nyń Qazaqstanmen yntymaqtastyqty odan ári keńeıtýge qyzyǵýshylyǵyn rastady.

Halyqaralyq elektrbaılanys odaǵy (HEO) BUU-nyń AKT salasyndaǵy jetekshi agenttigi bolyp tabylady. 1993 jyly HEO-ǵa tolyqqandy múshe bolǵannan bastap, Qazaqstan aqparattyq jáne telekommýnıkatsııalyq tehnologııalardyń qarqyndy damyp kele jatqan sektorynyń máselelerin sheshýge belsendi qatysyp, ınnovatsııalar salasynda yntymaqtastyqty damytýda.