Jańaózendik jumysshylar sanktsııalanbaǵan mıtıng ótkizgeni úshin polıtsııaǵa jetkizildi
El zańnamasy boıynsha, buqaralyq is-sharalar jergilikti atqarýshy organdardy habardar ete otyryp, turǵyndardyń tynys-tirshiligin qamtamasyz etetin nysandardyń qalypty jumysyna kedergi keltirmeıtindeı, arnaıy ruqsat etilgen jerde uıymdastyrylýy kerek.
Mıtıngke qatysýshylardyń jergilikti atqarýshy organdarǵa mıtıng ótkizý týraly ótinish joldamaı, jergilikti máslıhat sheshiminiń tiziminde joq jerde sanktsııalanbaǵan shara uıymdastyryp, «Beıbit jıyndar týraly» Zańyn buzýyna baılanysty polıtsııaǵa aktsııanyń birqatar uıymdastyrýshysy men belsendi qatysýshylary jetkizildi.
Zań buzǵandar QR Ákimshilik quqyqbuzýshylyqtar týraly kodeksiniń 488 jáne 667 baptary boıynsha jaýapqa tartylady. Atalmysh baptardyń talaptaryna sáıkes kináli adamdarǵa eskertý jasalady nemese 30 aılyq eseptik kórsetkish kóleminde aıyppul salynady. Sondaı-aq 15 táýlikke ákimshilik qamaýǵa alynýy múmkin.
Zańbuzýshylardyń áreketine qoldanystaǵy zańnama talaptary boıynsha baǵa beriledi.
Polıtsııa QR bekitilgen qoǵamdyq tártipti buza otyryp, jınalys, mıtıng, demonstratsııa, sherý, pıket sııaqty ózge de buqaralyq is-sharalardy uıymdastyrǵany úshin jaýapkershilik qarastyrylǵanyn eskertedi.
Eske salsaq, keshe Energetıka mınıstrligi ǵımaratynyń aldyna 70-ke jýyq jańaózendik («Beraly Mańǵystaý Company» kompanııasynyń burynǵy qyzmetkerleri) jınaldy.Búgin Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda vedomstvo ǵımaratynyń mańaıynda túnep shyqqan jańaózendik jumysshylardyń talaptary boıynsha resmı sheshim ázirlenip jatqanyn aıtty. Bul máselege baılanysty pikir bildirgen vıtse-premer Altaı Kólginov zań aıasynda áreket etý qajettigin, «tenderden utylǵan kompanııanyń qaıtadan utyp shyqqanyn talap etý» durys emestigin aıtty.