Jańaózendegi jumysshylardyń aryz-talabyn qaraıtyn komıssııa quryldy

AQTAÝ. QazAqparat - Jańaózendegi «KEZBI» munaı servıstik kompanııasy jumysshylarynyń aryz-talabyn sheshý maqsatynda arbıtrajdy komıssııa quryldy, dep habarlaıdy QazAqparat tilshisi.

Komıssııa quramyna kompanııanyń 4 jumysshysy, kompanııanyń basshylary, memlekettik eńbek ınspektsııasy basqarmasynyń ókilderi men Jańaózen qalasy ákiminiń orynbasary bar 12 adam endi.

«KEZBI» JShS-niń jumysshylary jalaqyny kóterý, tarıftik kesteni qaıta qaraý jáne jabdyqty qajetti standartarǵa sáıkestendirýdi, mereke kúnderi jumys istegeni úshin jalaqy, 13-shi jalaqy men zııandy jumys úshin ótemaqy berýdi suraıdy.

Búgin Mańǵystaý oblysynyń ákimi Serikbaı Trumov máseleniń mán-jaıyn bilý úshin Jańaózen qalasyna baryp, jumysshylarmen kezdesti.

«Bul jekemenshik mekeme. Jekemenshik mekeme bolǵandyqtan onyń ishki ekonomıkalyq jaǵdaıyna aralasa almaımyz. Bul jumys berýshi men jumysshynyń arasyndaǵy jaǵdaı. Sol jaǵdaıdy bileıin, óz kózimmen kóreıin, zańǵa sáıkesti máseleni aıtaıyn dep keldim. Ekonomıkalyq jaǵdaıdyń bári qarajatqa tireledi. Jekemenshik mekeme bar, memlekettik mekeme bar, munyń báriniń ara-jigin aıyryp aıtýymyz kerek. Zańdylyǵyn túsindirýimiz kerek. Barlyǵymyzǵa ortaq zań bar. Sondyqtan da barlyǵy zańnyń aıasynda sheshilýi kerek dep esepteımin»,-dedi oblys basshysy.

Jumysshylar aryzyna oraı qurylǵan komıssııa otyrysy jalǵasyp jatyr. Sheshimi aldaǵy ýaqytta habarlanady.