Jańaózende turaqty jumys isteıtin Vedomstvoaralyq shtab qurý qajet – QR Prezıdenti

NUR-SULTAN. QazAqparat – Jańaózende turaqty jumys isteıtin Vedomstvoaralyq shtab qurý qajet. Bul týraly Mańǵystaý oblysyna jumys sapary barysynda óńirdiń áleýmettik-ekonomıkalyq damýy jóninde keńes ótkizgen QR Prezıdenti Qasym-Jomart Toqaev aıtty, dep habarlaıdy QazAqparat tilshisi Aqordaǵa silteme jasap.

Prezıdent Qazaqstandy ekonomıkalyq jáne rýhanı-mádenı turǵydan damytýda Mańǵystaý óńiriniń róli zor ekenin atap ótti.

«30 jylda bul ólkege 7 trıllıon teńgeden astam ınvestıtsııa tartyldy. Aımaqtaǵy ónerkásip óndirisiniń kólemi 2 esege, ıaǵnı 3,5 paıyzdan 8 paıyzǵa deıin artty. Oblys óńirlik jalpy ónim deńgeıi boıynsha aldyńǵy qatardaǵy bestikke kiredi. Elimizdiń toraptyq kólik-logıstıka ortalyǵy osynda ornalasqan. Aqtaý jáne Quryq aılaqtary – Qazaqstannyń teńizge shyǵatyn qaqpasy. Táýelsizdik kezeńinde oblysta 11,3 mıllıon sharshy metr turǵyn úı paıdalanýǵa berildi. 78 mektep, 334 balabaqsha salyndy», – dedi Qasym-Jomart Toqaev.

Sonymen qatar Prezıdent aımaqta jyldam sheshýdi qajet etetin birqatar qordalanǵan másele bar ekenine nazar aýdardy. Atap aıtqanda, Memleket basshysy oblysta eńbek daýlary órship turǵanyn erekshe atap ótti.

«Jyl basynan beri óńirde osyndaı 150 daý týyndady. Bári zań aıasynda sheshilýge tıis. Jańaózende turaqty jumys isteıtin Vedomstvoaralyq shtab qurý qajet. Oǵan memlekettik organdar men «Samuryq-Qazyna» belsene qatysýy kerek. Bul shtab shuǵyl sheshim qabyldaýǵa jáne halyqpen tyǵyz qatynas ornatýy qajet», – dedi Prezıdent.

Memleket basshysy oblysta jumyssyzdyq máselesiniń ýshyǵyp turǵanyna mán berip, jergilikti jurttyń jumys tappaı júrgenin, al merdigerlerdiń basqa jaqtan eńbek kúshin tartatynyn aıtty. Qasym-Jomart Toqaev ákimdik pen «Samuryq-Qazyna» qoryna, eń aldymen, óńirdiń jergilikti turǵyndaryn jumyspen qamtýǵa basa mán berýdi tapsyrdy.