Jańaózende paravoleıboldan respýblıkalyq chempıonat ótti
Paravoleıbol boıynsha sporttyq is-shara Jańaózen qalasynyń 55 jyldyǵy, Mańǵystaý oblystyq máslıhatynyń 30 jyldyǵy jáne múmkindigi shekteýli jandarǵa arnalǵan «Alǵa» sport klýbynyń qurylǵanyna 30 jyl tolýyna oraı uıymdastyryldy.
Biriktirilgen týrnırge 32 oıynshy men tórt komanda qatysty. Olar: Jańaózen qalasynan «Ózenmunaıgaz», Aqtaý qalasynan Mańǵystaý ákimdiginiń komandasy, «KazPetroDrilling» bas demeýshi komandasy jáne «Juldyzdar» komandasy.
Komandada tirek-qımyl apparaty buzylǵan sportshylar da, otyrǵan qalypta oınaǵan adamdar da bolǵanyn atap ótken jón. Bul erekshe oıynda ártúrli áleýmettik toptaǵy adamdar birge básekege túsip, ózderiniń sporttyq qabiletin kórsetti. Jarysqa Batys Qazaqstan, Aqtóbe, Atyraý, Qyzylorda jáne Túrkistan oblystarynyń parosportshylary qatysty.
Týrnırdiń fınalynda Mańǵystaý oblysy ákimdiginiń komandasy men Jańaózen qalasynyń «Ózenmunaıgaz» komandasy kezdesti. Úsh oıynnyń qorytyndysy boıynsha Jańaózen komandasy 2:1 esebimen jeńiske jetti. Úshinshi oryndy «Juldyzdar» jáne «KazPetroDrilling» komandalary ózara bólisti.
Mańǵystaý oblysynda toǵyz sport túrimen shuǵyldanatyn múmkindigi shekteýli 845 sportshy bar. Olar fızıkalyq ózgeshelikterine qaramastan sportpen shuǵyldanyp júrgen, rýhy bıik jandar.
Sonymen qatar, óńirde múmkindigi shekteýli jandarǵa arnalǵan bir sport klýby jumys isteıdi jáne oǵan 591 adam qatysady.
Jańaózende 1993 jyly qurylǵan múmkindigi shekteýli jandarǵa arnalǵan «Alǵa» klýby jumys isteıdi. Qazirgi ýaqytta Quralbek Seıdovtyń tóraǵalyǵymen jumys isteıtin klýbta jeti úıirme bar, onda 60 adam sportpen belsendi túrde aınalysady.
Aıta keteıik, Mańǵystaýdan múmkindigi shekteýli úsh sportshy Qytaıdaǵy Paralımpıada oıyndarynda Qazaqstannyń atynan qatysady. Meıirbek Ótepov-ústel tennısi boıynsha, Erbolat Altaev-paravoleıboldan jáne Ǵanı Esentemirov - parapaýerlıftıngten.
Sonymen qatar, bıyl Qazaqstan tarıhynda tuńǵysh ret bizdiń voleıbolshylar Parıjdegi 2024 jylǵy XVII Jazǵy Paralımpıada oıyndaryna qatysýǵa lıtsenzııa aldy. Qazaqstandyq quramaǵa úsh mańǵystaýlyq kiredi. Olar Erbolat Altaev pen Baýyrjan Orazǵalıev jáne olardyń jattyqtyrýshysy Quralbek Seıdov.
Óńir basshysy Nurlan Noǵaev sportshylardy quttyqtap, aldaǵy Olımpıadaǵa sáttilik tiledi. Sondaı-aq «Alǵa» klýbyna aımaqtaǵy parasportty damytýǵa qosqan zor úlesi úshin alǵysyn bildirdi.
- Paraolımpıadalyq sportshylar óz sheberlikterin kórsetip qana qoımaı, bárimizge úlgi bola bildi. Sportpen shuǵyldaný úlken erik-jigerdi, shydamdylyq pen tabandylyqty qajet etedi. Paraolımpıadashylardyń sportqa degen adaldyǵy bizdiń elimizdiń atyn búkil álemge tanymal etetinine senimdimiz. Bul eń aldymen sportshylardyń, olardyń jattyqtyrýshylarynyń jáne múmkindigi shekteýli jandarǵa arnalǵan klýbtardyń eńbegi. Biz Mańǵystaýda salaýatty ómir saltyn nasıhattaý jáne deni saý ult qurý maqsatynda, jańa sport ǵımarattaryn salý jáne sport keshenderine jóndeý jumystaryn júrgizýdemiz, - dep atap ótti Nurlan Noǵaev.
Іs-shara «Alǵa» klýbynyń 30 jyldyǵyna arnalǵan merekelik kontsertpen aıaqtaldy, onda jergilikti ártister óner kórsetti. Óńirde parasporttyń damýyna eleýli úles qosqan jandar marapattaldy.