Jańaózende Qazaq gaz óńdeý zaýytynyń qurylysy qashan bastalady

ASTANA. QazAqparat – Jańaózen qalasynda Qazaq gaz óńdeý zaýytynyń qurylysyna daıyndyq bıylǵy jyl sońynda bastalyp, ony 2025 jyly aıaqtaý josparlanǵan. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Memleket basshysynyń «Áleýmettik-ekonomıkalyq jáne qoǵamdyq-saıası jaǵdaıdy turaqtandyrý jónindegi sharalar týraly» 2022 jylǵy 5 qańtardaǵy keńeste berilgen tapsyrmasyna sáıkes suıytylǵan munaı gazyn satý baǵasyn ýaqytsha memlekettik retteý engizildi.

Osyǵan baılanysty jobany iske asyrý oń ekonomıkalyq nátıje bergen joq. Búgingi tańda «Samuryq-Qazyna» UÁQ» AQ, «QazMunaıGaz» UK» AQ-men birlesip, mynadaı is-sharalardy pysyqtady: pre-FEED jáne tehnıkalyq-ekonomıkalyq negizdeme ázirlendi (TEN); TEN boıynsha memlekettik saraptamanyń oń qorytyndysy, sondaı-aq qorshaǵan ortaǵa áserin baǵalaý boıynsha qorytyndysy alyndy; qordyń kepildigimen «Qazaqstan Halyq Banki» AQ-nyń qaryz berýin maquldaý, sondaı-aq qordyń ınvestıtsııalyq-strategııalyq komıtetiniń jobany iske asyrý týraly oń sheshimi qabyldandy», - delingen Álıhan Smaıylov jaýabynda.

Úkimet basshysy óziniń tapsyrmasyna sáıkes jobany iske asyrýdy jedeldetý maqsatynda qor egjeı-tegjeıli jol qartasyn ázirlegenin atap ótedi. Onda qurylysty 2025 jyly aıaqtaý kózdelgen.

«Qazirgi ýaqytta «QazGÓZ» JShS «Samuryq-Qazyna Kelisimshart» JShS-men birlesip, jobanyń qurylysy boıynsha qyzmet kórsetýshini anyqtaý úshin tenderlik rásimder júrgizýde. Bul rette qordyń aqparaty boıynsha osy jyldyń sońyna deıin joba boıynsha qurylys jumystaryna daıyndyq bastalatyn bolady», - dedi Premer-Mınıstr.