Jańaózende 1,4 mlrd teńgege sport kesheni men 20 oıyn alańy salynady
Áleýmettik jobalar Mańǵystaý oblysy ákimdigi men «Halyq» qaıyrymdylyq qory qol qoıǵan memorandým aıasynda iske asyrylmaq. Jańaózen qalasynda jańa dene shynyqtyrý-saýyqtyrý kesheni men 20 sporttyq alań salýǵa qaıyrymdylyq qor 1,4 mlrd teńge bóledi.
Jańaózen qalasynyń ákimi Aıbek Qosýaqulynyń aıtýynsha, jańa alańdar Jańaózen qalasynyń 55 jyldyǵyna oraı josparlanǵan.
«Jańaózen qalasyna jańa alańdar men sporttyq keshen salynady. Bul jańalyq qala turǵyndaryn qýantary sózsiz. Qazir bul jobaǵa jergilikti ákimdik tarapynan 20 jer telimin arnaıy qarastyryp otyrmyz. «Halyq» qory qomaqty qarjy bólip, qazan aıynyń 20- na deıin 20 oıyn alańyn aıaqtap, qalanyń 55 jyldyǵyna oraı qoldanysqa beredi», - deıdi Aıbek Qosýaquly.
«Halyq» qaıyrymdylyq qorynyń basqarýshy dırektory Narıman Ábilshaıyqov yntymaqtastyq memorandýmy sportpen shuǵyldanatyn qala turǵyndarynyń belsendi demalysy úshin zaman talabyna saı jaıly jaǵdaı jasaýǵa baǵyttalǵanyn aıtady.
«Sport kesheninde bir táýlikte 200-den astam adam aınalysa alatyn bolady. Al úı aldyndaǵy oıyn alańdary 3 bólikten turady. Alańnyń sapasy álemdik deńgeıde zamanaýı úlgide jasaqtalǵan. Bul ıgi isterdi júzege asyrýǵa qaıyrymdylyq qordyń demeýshileri Tımýr Qulybaev pen Dınara Qulybaevanyń qoldaý kórsetip otyrǵanyn aıta ketken jón. Búgingi kelisilgen memorandýmnyń nátıjesinde taǵy da aýqymdy jumystar júrgiziletin bolady», - deıdi Narıman Ábilshaıyqov.
Dene shynyqtyrý-saýyqtyrý kesheni – sport áýesqoılary bokspen, kúrespen, shaǵyn fýtbol, tennıs, voleıbol jáne basketbolmen shuǵyldana alatyn, sporttyq belsendilikti nasıhattaıtyn, erekshe sáýlet nysany. Sondaı-aq sport kesheni júgirý jolymen, sportzalmen, kıim aýystyratyn jáne jýynatyn bólmelermen jabdyqtalady.
Jańaózen qalasynda jańa dene shynyqtyrý-saýyqtyrý keshenin salý turǵyndardy sportqa baýlyp qana qoımaı, jańa jumys oryndarynyń ashylýyna da túrtki bolmaq. Keshenniń qurylysy kezinde 150 ýaqytsha jumys orny qurylyp, paıdalanýǵa berilgennen keıin 50 turaqty jumys orny ashylatyn bolady.
Jańaózen qalasynyń turǵyny Saqı Myńbaı bul bastama qaladaǵy balalardyń da, jastardyń da máselesin sheshetinin aıtyp otyr.
«Qazir halyq sany kúrt ósip keledi. Jastarǵa jańa jumys oryndarynyń ashylýy kóńil kónshitedi. Balalarymyzǵa arnalyp jańa alańdardyń salynýy da qatty qýantady. Óskeleń urpaq mádenı ortada qalyptasýy tıis. Al jańa jumys oryndary jastardyń damýyna, ósýine tikeleı áser etedi. Osyndaı jobalar damı bersin degim keledi», - dedi Saqı Myńbaı.
«Halyq» jeke qaıyrymdylyq qory Jańaózendegi sport ınfraqurylymyn damytýǵa erekshe kóńil aýdaryp otyr. 2022 jyly qor tolyǵymen jabdyqtalǵan 16 vorkaýt jáne shaǵyn fýtbol alańdaryn salǵan. Búginde barlyq oıyn alańy ákimdiktiń menshigine berildi.
2016 jyly qurylǵan «Halyq» jeke qaıyrymdylyq qory qazaqstandyqtarǵa júıeli kómek kórsetip jatyr. Qor qurylǵaly 45 mlrd teńgeden astam somaǵa qaıyrymdylyq jobalary men baǵdarlamalardy iske asyrǵan.
Ákimdik pen «Halyq» qory arasyndaǵy yntymaqtastyq basym áleýmettik mindetterdi sheshýde tabysty áriptestiktiń úlgisi ekenin atap ótý mańyzdy. Memlekettik organdar men jeke uıymdardyń kúsh-jigerin biriktirý azamattardyń qajettilikterin tıimdi qanaǵattandyrýǵa múmkindik beredi.
Jańaózen qalasynyń sportshylary men jattyqtyrýshylardyń «Birlik» qoǵamdyq birlestiginiń tóraǵasy Batyrbek Jaılybaev sport alańdarynyń mańyzyn atap otyr.
«Halyq» qaıyrymdylyq qory osyǵan deıin birneshe jobalardy iske asyrdy. Jattyqtyrýshy retinde balalarǵa árdaıym sporttyq úı-tapsyrmalaryn berip otyramyz. Balalar úı jaǵdaıynda jattyǵýlaryn jasap, erkin daıyndala alady. Endigi salynatyn 20 alań da turǵyndar ıgiligi úshin», - dedi Batyrbek Jaılybaev.