Jańaózen-Kendirli tasjolynda bolǵan jol-kólik apatynan 10 adam qaza tapty

AQTAÝ. QazAqparat – Mańǵystaý oblysyndaǵy Jańaózen-Kendirli tasjolynda jol-kólik apatynan 10 adam qaza tapty. Onyń beseýi kámeletke tolmaǵan, dep habarlaıdy QazAqparat tilshisi.

Oqıǵa 16 maýsym kúni saǵat 21:30 shamasynda bolǵan.

Osy oqıǵaǵa baılanysty Mańǵystaý oblysy Polıtsııa departamentiniń bastyǵy óńir turǵyndaryna úndeý jasady.

Qaza bolǵandardyń týystary men jaqyndaryna kóńil aıta otyryp, eskertkim keledi. Jol-kólik oqıǵasynyń negizgi sebebi – kóliktiń qarsy baǵytqa shyǵyp ketýi. Keshegi qorqynyshty apatty taldaı otyryp, «Toyota» kóliginiń ishinde 8 adam bolǵanyn atap ótkim keledi. Eger erejeler saqtalyp, júrgizýshi men jolaýshylar qaýipsizdik beldigin taǵyp, sondaı-aq balalarǵa arnalǵan oryndyqtar paıdalanylsa, onda kólikke tek 4 adam ǵana syıady. Al, apat bolǵan jaǵdaıda bul quraldar adam ómiri men densaýlyǵyn saqtap qalýy múmkin. Osy jol-kólik oqıǵasyndaǵy ekinshi kólik – «Duster» avtokóliginiń júrgizýshisi bir aı buryn qaýipsizdik beldigin taqpaǵany úshin eskertý alyp, aıyppul salynǵan. Osyǵan baılanysty jol qozǵalysy erejelerin saqtaýdy jáne óz ómirlerińiz ben balalaryńyzdyń ómirine jaýapkershilikpen qaraýlaryńyzdy suraımyn!

- dep úndeý jasady aımaq turǵyndary men qonaqtaryna polıtsııa general-maıory Aıan Dúısembaev.