Jańaózen qalalyq sotynyń sýdıasy para alǵany úshin sottaldy

AQTAÝ. QazAqparat – Jańaózen qalalyq sotynyń sýdıasy 500 myń teńge para alǵany úshin 3jylǵa sottaldy, dep habarlaıdy QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.

Mańǵystaý oblysynyń sybaılas jemqorlyqqa qarsy qyzmeti Jańaózen qalalyq sotynyń sýdıasy A.S. Seıilhanovaǵa jáne sol qaladaǵy ákimdiktiń TKSh bas mamany A.E. Aqnazarovqa qatysty sybaılas jemqorlyq qylmys jasady degen kúdik boıynsha sotqa deıingi tergeýdi aıaqtady.

A.Seıilhanova Jańaózen qalalyq jer qatynastary bóliminiń talap aryzyn qaraýsyz qaldyrý týraly úkim shyǵarǵany úshin azamat A.E.Aqnazarov arqyly 500 myń teńge kóleminde para aldy degen kúdikke ilingen bolatyn.

Bul faktini sybaılas jemqorlyqqa qarsy qyzmet sottyń ishki qaýipsizdik jáne Joǵarǵy sottyń Sybaılas jemqorlyqtyń aldyn alý bólimimen birlesip anyqtady.

«17 qazanda Aqtaý qalalyq sotynyń úkimimen A.Seılihanova sottalyp, oǵan 3 jyl merzimge bas bostandyǵynan aıyrý jazasy taǵaıyndaldy.

Osy sot úkimimen A.Aqnazarov ta sottalyp, oǵan 1 jyl bas bostandyǵynan aıyrý jazasy belgilendi», delingen habarlamada.

Atalǵan tulǵalar ómir boıy memlekettik qyzmette laýazymdy qyzmetpen aınalysý quqyǵynan aıyryldy.