Jańaqorǵanda Eltańba avtory jerlesterimen júzdesti

JAŃAQORǴAN. QazAqparat - QR Memlekettik Eltańbasynyń avtory Jandarbek Málibekov týǵan jeri - Qyzylorda oblysy Jańaqorǵan aýdanyna qarasty Ekpindi aýylyna arnaıy keldi. Belgili azamat óz jerlesterine baǵaly syılyqtardy tartý etti, dep habarlaıdy QazAqparat tilshisi.

Bul shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda júzege asyrylyp keledi. Onda Tuńǵysh Prezıdent - Elbasy «týǵan jerge, onyń mádenıeti men salt-dástúrlerine aıryqsha ińkárlikpen atsalysý – shynaıy patrıotızmniń mańyzdy kórinisteriniń biri» dep atap kórsetken bolatyn.

Belgili azamat týǵan aýylynyń gúldenýine, ósip-órkendeýine atsalysyp keledi. Búgingi kúnge deıin aýyl ortalyǵynan meshit úıin salýǵa kóńil bóldi. Sondaı-aq, aýyl turǵyndaryna ózge de syı-sııapatyn jasap keledi.

Jerlesterimen júzdesý barysynda Jandarbek Málibekov jańa úlgide jasalǵan Eltańbany aýyl ákimine tabystady. Sondaı-aq, qajetti kitaptardy aýyldaǵy meshit, mektep, kitaphana ujymyna tartý etti.

«Árkimge týǵan jeri ystyq. Adamzat balasy dúnıege shyr etip kelgen jerine kindigimen baılanady. «Týǵan jer» degen qasıetti uǵymdy tóbemizge qoıyp, qasterleıtinimiz de sondyqtan», dedi Jandarbek Málibekov jerlesterimen júzdesý barysynda.