Jańadan qurylǵan Saýran aýdanynda halyq sany 100 myńnan asady

TÚRKІSTAN. QazAqparat – Túrkistan oblysynda Saýran aýdanynyń qurylýyna baılanysty saltanatty shara ótti. Jıynda aýdan shekarasy anyqtalyp, aldaǵy josparlar jarııa etildi, dep habarlaıdy QazAqparat tilshisi.

Jańa Saýran aýdanynyń ákimshilik ortalyǵy Shornaq aýyly bolady. Aýdannyń ákimshilik-aýmaqtyq quramyna Shaǵa, Jańa Iqan, Eski Iqan, Úshqaıyq, Iassy, Oranǵaı, Qarashyq, Júınek, Babaıqorǵan, Shornaq, Jibek joly, Maıdantal aýyldyq okrýgteri kiredi.

Qoldanystaǵy zańdarǵa sáıkes, ákimshilik qurylymyn jasaqtaý úshin aldymen aýdandyq máslıhat qurylmaq.

Keıinnen máslıhat kelisimimen, aýdan ákimi taǵaıyndalady. Aýdandy basqarý júıesi jáne bıýdjeti bekitilmek. Quqyq qorǵaý organdary men mınıstrlikterdiń aýdandyq bólimsheleri óz qyzmetin bastaıdy dep josparlanǵan.

Aıta keteıik, Túrkistan oblysy qurylǵaly bul aýyl ákimdikteri Kentaý qalasynyń qaramaǵyna ótken bolatyn.

Aımaq basshysy Ómirzaq Shókeev saltanatty sharada jergilikti turǵyndarmen kezdesip, aldaǵy josparlarymen bólisti.

«Kezinde iri saýda ortalyǵy negizinde qurylyp, Aq ordanyń astanasy bolǵan Saýran ataýy óziniń tarıhı mártebesin qaıta aldy. Uly Jibek jolynyń boıynda ornalasqan, tarıhy Túrkistan uǵymymen bite qaınasyp jatqan ortaǵasyrlyq Saýran qalasynyń ataýyn jańa aýdanǵa berý Ulystyń uly kúni qarsańyndaǵy eldi qýantqan erekshe oqıǵa dep bilemin», – dedi oblys ákimi.

Al, jańa aýdannyń qurylýyna baılanysty atqarylatyn barlyq is-sharalardyń júzege asýymen arnaıy komıssııa aınalysady.

Oblys ákimi óz sózinde jańa aýdannyń damý jospary jaıly bólisti. Shornaq aýyly aýdan ortalyǵy retinde damıdy.

Jańa aýdandy qurý arqyly aýdan quramyna enetin eldi mekenderdegi memlekettik qyzmetterdi alý sapasyn kóterýge jol ashylady.

Áleýmettik máseleler oń sheshimin taýyp, jańa jumys oryndarynyń ashylýy sekildi mańyzdy máselelerge basymdylyq beriledi.

Aýyl sharýashylyǵy salasynyń qarqyndy damýyna kúsh salynbaq. Quqyq qorǵaý organdary men mınıstrlikterdiń aýdandyq bólimsheleri óz qyzmetin bastaıdy.

Oblys ákimi atap ótkendeı, aldaǵy 1-2 jyldyń kóleminde barlyq ákimshilik, áleýmettik nysandardyń qurylysy bitip, paıdalanýǵa beriledi dep josparlanýda.

Al ázirge bul memlekettik organdar men aýdan ákimdigin qosa alǵanda ýaqytsha jekelegen nysandardy jalǵa alyp, jumysyn júrgizedi.

Jańadan qurylatyn aýdan halqynyń sany 100 myńnan asady.