Jańadan qurylǵan «Asyl bala» qaýymdastyǵy balalar múddesine baılanysty birqatar baǵyttardy aıqyndady

ASTANA. QazAqparat - «Asyl bala» qaýymdastyǵy balalar múddesine baılanysty birneshe sektorda jumys isteıdi. Bul týraly búgin «QR Konstıtýtsııasy 20 jyl balalardyń quqyǵy men densaýlyǵyn qorǵaýda» atty respýblıkalyq konferentsııa barysynda QazAqparatqa bergen suhbatynda «Qazaq qyzy» QB tóraıymy Qaraqat Ábden málim etti.

«Biz balalar máselesimen aınalysatyn barlyq zańgerlik jáne jeke tulǵalardy «Asyl bala» qaýymdastyǵynyń aıasynda biriktirip otyrmyz. Barlyq óńilerdegi úkimettik emes uıymdar osy baǵyttaǵy jumysta kúsh-jigerlerin biriktirýge nıetti. Qaýymdastyq quramynda birneshe sektorlardy aıqyndadyq. Osynyń aıasynda qaıyrymdylyq qorlary, medıtsına, balalar densaýlyǵyna kómek, mektepke deıingi jáne mekteptegi bilim berýge, qosymsha bilimge, balalardyń óneri men sportyna, sondaı-aq aýyl balalary máselesi erekshe mán berilgen. Qaýymdastyq óz jumysynda balalardyń ómirin jarqyn etý úshin barlyq salalardy qamtýdy maqsat tutyp otyr»,-dedi Q. Ábden.

Onyń sózine qaraǵanda, qaýymdastyq jumysy múshelerdiń qarjysyna jumys isteıtin bolady.

«Balalar quqyǵy men múddesi salasynda jumys isteıtin Qazaqstannyń qoǵamdyq birlestikteri men úkimettik emes uıymdary jańadan qurylǵan «Asyl bala» qaýymdastyǵynyń aıasynda birigýi arqyly biryńǵaı ortaq alańdy quramyz jáne biryńǵaı bazany qalyptastyramyz»,-dedi Q. Ábden.

Sóz sońynda ol qaýymdastyq balalar sýıtsıdiniń aldyn alýǵa baǵyttalǵan sharalardy erekshe nazarǵa alatynyn atap ótti.

Budan buryn habarlanǵandaı, búgin Qazaqstanda ÚEU-lar men qoǵamdyq birlestikterdiń «Asyl bala» qaýymdastyǵy qurylǵan bolatyn.